Komandante sira PNTL nian ne'ebé simu pose hasai foto hamutuk, tersa (21/04/2020). Imajen/Domingos Piedade

DILI, 21  abríl 2020 (TATOLI) – Komandu Jerál Polísia Nasionál Timor-Leste  (PNTL), ohin, halo nomeasaun ofisiál ba Superintendente Xefe Orlando Gomes, ba  komanda Unidade Espesiál Polísia (UEP) hodi troka Superintendente Xefe Afonso dos Santos.

Komandante UEP foun, Orlando Gomes. Imajen/Domingos Piedade

Komandu Jerál PNTL mós halo nomeasaun ba Komandante UEP sesante, Superintendente Xefe Afonso dos Santos, ba hala’o hikas knaar foun hodi komanda Departamentu Justisa PNTL.

Nomeasaun ne’ebé hala’o diretamente hosi Komandante Jerál PNTL,  Komisáriu Faustino da Costa, nu’udar desizaun Komandu Jerál nian ne’ebé propoin kedas iha vaga hirak iha Komandu Jerál dezde tinan 2015 ba Governu.

“Vaga sira-ne’e Governu aprova  no promosaun sira-ne’e hala’o kedas ona iha loron 27 marsu 2020. Komandu hahú ona nomeasaun, kolokasaun, re-kolokasaun no transferénsia,” informa Komisáriu Faustino da Costa, hodi responde jornalista-sira hafoin prezide serimónia pose iha Komandu Jerál PNTL, Caicoli, Dili.

Komisáriu Faustino da Costa informa,   tuir loloos hala’o tiha ona nomeasaun no pose antes, maibé situasaun mak la’o nune’e hela de’it mak aniversáriu PNTL nian mós halo simples de’it tanba Timor-Leste enfrenta situasaun Estadu Emerjénsia.

Biban ne’e, Superintendente Xefe, Orlando Gomes promete ba Komandu Jerál PNTL atu hala’o knaar ho profisionál hoi serbí povu no estadu no buka mellora di’ak liutân serbisu komandu EUP nian iha futuru.

Orlando Gomes hateten, orientasaun ne’ebé mak nia-parte atu implementa iha UEP mak hanesan, dahuluk, kona-ba prosedimentu katak kualkér asaun atividade tenke bazeia ba lei, regra no regulamentu aplika iha Timor-Leste.

Daruak, profisionalizmu katak kualkér asaun ka atividade  tenke ho loloos no aliñamentu ho tarefa no funsaun UEP nian.

Datoluk, proporsionalidade katak kualkér asaun no atividade ne’ebé mak UEP halo tenke ekilíbriu no bazeia ba morál no étika.

“Ha’u hanoin pontu tolu ne’e mak atu ita hadi’a iha UEP, no  UEP prontu serbí  povu no nasaun Timor-Leste,” afirma Orlando Gomes.

Komandante UEP sesante, Superintendente Xefe Afonso dos Santos/Imajen/MI

Hosi sorin-seluk, komandante sesante UEP, Afonso dos Santos, hateten,  durante tinan 11 iha UEP halo ona buat barak no tempu ona atu ezekuta orden komandu nian no mai fali iha departamentu justisa nian atu bele hadi’a buat ruma iha departamentu ne’e.

“Ha’u hanoin mak ne’e nu’udar komandante sesante sei fó hanoin ba komandante foun ne’ebé mak uluk sai tiha ona segundu komandante UEP,  nune’e mak aban realiza enkontru ida ho komandante foun ho segundu komandante atu motiva UEP iha futuru sai profisionál liután,” tenik Afonso dos Santos.

Liuhosi serimónia ne’e,  Komandu Jerál PNTL mós halo nomeasaun ba membru poténsia sira-seluk asume knaar foun mak hanesan Superintendente Damião  Correia ba Segundu Komandante UEP, Superintendente Joni Viana das Viegas, ba Komandante PNTL Munisípiu Manufahi, Superintendente Asistente Abrão Filipe Dias Quintas ba Segundu Komandante PNTL Manufahi no mós Superintendente Asistente Domingos Gregorio Soares ba Segundu Komandante PNTL Manatuto.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here