Deputado iha Uma Fukun Parlamentu Nasionál. Imajen/Egas Cristovao

DILI, 21 abríl 2020 (TATOLI)—Deputadu Bankada Parlamentár FRETILIN, David Ximenes ‘Mandati’ hateten, Konstituisaun Repúblika Demokrátika Timor-Leste (RDTL) mak obriga Parlamentu Nasionál (PN) halo fiskalizasaun ba fundu COVID-19 ho montante millaun $150.

Oras ne’e, David Ximenes ‘Mandati’ hatutan, liuhosi rede sosiál facebook ema balu akuza deputadu sira fahe orsamentu $500.000 ba malu ne’e maibé loloos ne’e konstituisaun fó dalan atu PN halo fiskalizasaun.

“Kuandu ita aprova orsamentu ne’e ho motivu fiskalizasaun, ne’e konstituisaun mak haruka. Orsamentu ne’ebé aprova halai ba despeza públika. Kuandu iha ona despeza públika, parlamentu tenke fiskaliza para orsamentu ne’e ezekuta halo  nusá,”  dehan nia liuhosi plenária, tersa ne’e.

Entretantu, Deputada Partidu Demokrátiku, Elvina Sousa, konsidera krítika sira iha mídia hanesan espekulasaun no laiha baze legál.

“Ami aprova ona Fundu COVID-19 ho montante millaun $150. Hosi orsamentu boot ne’e parlamentu tenke halo fiskalizasaun nune’e bele hatene ezekusaun orsamentu ne’e la’ó loos ka lae. Tanba ne’e, ami-nia funsaun atu halo check and balance. La’ós ema balun dehan kada deputadu hetan osan dolár $800. Ha’u pesoál komprende kolega balun nia sentimentu iha rede sosiál,” nia dehan.

Deputada PD ne’e argumenta, PN husu orsamentu $500.000 hodi halo fiskalizasaun ba ezekusaun fundu COVID-19 maibé provizoriumente parlamentu seidauk uza osan ne’e hodi halo fiskalizasaun maibé parlamentu kontinua uza orsamentu duodésimu hodi halo fiskalizasaun.

Deputada Elvina Sousa esplika, Konstituisaun RDTL artigu 92 (definisaun) hateten, Parlamentu Nasionál mak órgaun soberania Repúblika Timór-Leste nian ne’ebé  reprezenta ema timoroan tomak iha kbiit atu halo lei, atu fiskaliza no atu halo desizaun polítika.

Entretantu, Deputadu Partidu CNRT, Domingos de Carvalho, hateten espekulasaun iha rede sosiál facebook halo deputadu sira sai vítima tanba orsamentu $500.000 seidauk uza ba halo fiskalizasaun.

Deputadu CNRT ne’e esplika, parlamentu aprova ona millaun $250 no hosi millaun $250 ne’e millaun $150 tau ba fundu COVID-19 no millaun $100 reforsa saldu tezouru.

“Hosi millaun $150 ne’e mak parlamentu hasai $500 mill ne’e maibé la’ós hasai diretamente ba finansa parlamentu nian, ne’e iha Banku Sentrál Timor-Leste. Kuandu ami planeia ba halo fiskalizasaun foin halo pedidu ba Ministériu Finansa la’ós ba foti direta hanesan ema sira ko’alia iha facebook ne’e,” nia hateten.

Antes ne’e, Prezidente Parlamentu Nasionál, Arão Noe de Jesus da Costa Amaral, klarifika orsamentu $500.000 la’ós hanesan públiku nia hanoin katak osan ne’e atu fahe ba deputadu sira.

“Tanba Parlamenu Nasionál halo fiskalizasaun ba atividade hotu-hotu ne’ebé Governu ezekuta ne’e mandatu konsitusionál. Tuir artigu 92 katak Parlamentu Nasionál nia kna’ar tolu fiskalizasaun, desizaun polítika no halo lei. Iha programa lubuk ne’ebé Parlamentu Nasionál tenke halo inklui rekuperasaun ekonómika, tanba Parlamentu Nasionál nia kna’ar la’os atu aprova de’it maibé atu aprova tenke hatene análiza no estuda buat sira-ne’e tenke iha fiskalizasaun. Tanba ita tenke iha faze sira para hodi halo,” dehan, Arão Noé de Jesus, iha Parlamentu Nasionál, segunda horisehik.

Nia esplika, orsamentu millaun $150 ne’e Governu seidauk implementa nune’e mós hanesan Parlamentu Nasionál, tanba sei husu komisaun espesializada sira dezeña programa submete ba meza Parlamentu Nasionál hafoin dirije ba sekretaridu junta programa mak foin planu ezekusaun.

“Parlamentu Nasionál  mak halo fiskalizasaun entaun iha dezlokasaun para iha akompanamentu se ba li’ur maibé iha Dili laran la presiza (perdiem). Publiku lalika preokupa, se osan la gasta fila-fali ba kofre estadu, no osan ne’e la tau iha Parlamentu Nasionál. Parlamentu Nasionál tau iha bolsu fahe ba malu ne’e laiha ida,” nia dehan.

Tanba, tuir nia, fundu COVID-19 ne’e jestaun orsamentu únika, osan hotu-hotu tau iha Banku Sentrál, pedidu tama hafoin jere no baixa  mak foin mak asesu. Tanba ne’e, husu ba publiku intepreta  informasaun la’ós osan tau ida-idak tau nia kofre ne’e, la loos.

Parlamentu Nasionál aprova ona pedidu levantamentu ho millaun $250 no hosi montante ne’e millaun $100 reforsa kofre estadu hodi finánsia Dotasaun Orsamentu Temporáriu (DOT), millaun $150 espesífiku ba fundu COVID-19.

Hosi millaun $150 ne’e, Parlamentu Nasionál propoin $500.000 hodi halo atividade fiskalizasaun maibé publiku kestiona maka’as orsamentu $500.000 refere.

Notísia Relevente: KM Aprova Dekretu-Lei Regula Fundu COVID-19 Millaun $150

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here