Enkontru dahuluk Komisaun Interministeriál Fundu COVID-19 iha tersa (21/04), iha Salaun Ministériu Finansa. Imagen/Mídia MF

DILI, 21 abríl 2020 (TATOLI) – Hafoin estabelese Sekretariadu Tékniku, Komisaun Jestaun Fundu COVID-19 realiza reuniaun dahuluk hodi halo apresiasaun ba proposta sira ne’ebé aprova ona iha komisaun interministeriál foin lalais.

Konsellu Jestaun Fundu COVID-19 ne’e lidera husi Ministériu Finansa (MF) no ninia membru sira hanesan Ministériu Negósiu Estranjeiru no Kooperasaun (MNEK), Ministériu Saúde (MS), no Ministériu sira seluk ne’ebé envolve iha prosesu sira kona-ba prevensaun COVID-19, inklui Sentru Integradu Jestaun Krize (CIGC, sigla portugés), ne’ebé reprezenta husi Koordenadór ba Servisu Administrasaun no Finansa CIGC, Deonisío Santos.

Ministru Negósiu Estranjeiru no Kooperasaun, Dionísio da Costa Babo Soares, relata Konsellu Jestaun Fundu COVID-19 ne’e estabelese husi Parlamentu Nasionál, hodi halo servisu kona-ba Fundu COVID-19 ne’ebé aprova tiha ona.

“Enkontru dahuluk halo mós halo apresiasaun ba proposta sira ne’ebé hetan tiha ona aprovasaun husi komisaun interministeriál COVID-19 no Konsellu Ministru rasik. Diskusaun sira ne’e abranze ba liu natureza prosedimentu no mekanizmu atu identifika mós kabementu fonte orsamentu ba proposta sira ne’e hodi haree ida ne’ebé maka loos”, hateten Ministru Dionísio hafoin reuniaun Konsellu ramata iha Salaun Ministériu Finansa, Aitarak-Laran, tersa ne’e.

Notísia Relevante: KM Aprova Dekretu Ezekusaun ba Fundu COVID-19

Realizasaun reuniaun dahuluk ne’e hodi haree ba asuntu sira hanesan interprestasaun kestaun legál ba Dekretu Lei númeru 12/2020, kona-ba implementasaun fundu ne’e rasik, halo diskusaun prosedimentu fundu, inklui konsellu nia kompeténsia, estabelese mós Sekretariadu Tékniku ne’ebé Dekretu Lei Númeru 12/2020 haruka estabelese ona hodi apoia Konsellu Jestaun Fundu COVID-19 halo ninia servisu.

Aleinde ne’e, Konsellu ne’e halo apresiasaun mós ba proposta orsamentu ne’ebé mak atu sosa materiál, ekipamentu ba COVID-19 nian, inklui ai-moruk no materiál sira ne’ebé tau ba iha ospitál.

“Antes ne’e halo ona adiantamentu lubuk ona. Hanesan Governu selu tiha ona, liuhosi organizasaun PNUD. Momentu ne’e hasai mós osan ajuda selu kustu ba estudante sira ne’ebé uza Aviaun Nova Zelándia nian lori husi Wuhan bá Nova Zelándia no sira kontinua to’o mai Timór. Hafoin kustu ne’ebé ita gasta ona ba ema sira iha kuarentena, nune’e mós iha ona orsamentu hodi estabelese Sentru Integradu Jestaun Krize. Buat sira ne’e hotu kontempla hotu ona iha laran no ami halo ona apresiasaun”, nia akresenta.

Konsellu mós haree proposta lubuk ida ne’ebé maka tenke aselera lalais kona-ba kompra ekipamentu, ai-moruk, materiál, haree mós ba prosedimentu despaza apoia subsídiu ba estudante naun bolseiru sira iha rai-liur hodi bele prosede.

“Maibé sei iha buat balun ne’ebé ami husu atu kompleta. Hakarak dehan de’it katak prosesu ne’ebé halo tiha ona ho organizasaun PNUD sira, halo hela akizisaun no espera katak bele to’o lalais iha ita-nia rain”, afirma governante ne’e.

Antes ne’e, iha loron 6 abríl, Prezidente Repúblika, Francisco Guterres ‘Lú Olo’ promulga ona Dekretu Parlamentu Nasionál númeru 14/V, kona-ba autorizasaun ba realizasaun transferénsia estraordinária husi Fundu Petrolíferu ho montante millaun $ 250.

Husi totál orsamentu millaun $250 ne’ebé aprovadu iha Parlamentu Nasionál, millaun $150 aloka ba finansiamentu medida prevensaun no kombate moras COVID-19 iha ámbitu Fundu COVID-19, millaun $100 ba Konta Jerál Tezouru no hosi millaun $150 ne’e, aloka $500.000 ba Parlamentu Nasionál atu dezenvolve polítika no programa iha ámbitu prevensaun no kombate surtu COVID-19.

Iha loron 2 abríl 2020, Parlamentu aprova orsamentu millaun $250 no iha loron tuir mai, sesta (03/04), haruka ba PR Lú Olo.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here