Tanki bee ne'ebé monta iha fatin públiku hodi ajuda komunidade fase liman, hodi kombate Covid-29. Imajen UNICEF

DILI, 21 abril 2020 (TATOLI)—Governu Timor-Leste liuhosi Ekipa Task Force Diresaun Nasionàl Servisu Água (DNSA) ba Estadu Emerjénsia no Kombate COVID-19 monta ona profil hamutuk 40 iha territóriu Timor-Leste.

“Hahú dekreta Estadu Emerjénsia, ami-nia ekipa monta ona profil hamutuk 40 ne’ebé monta iha munisípiu hamutuk 16 no iha monta iha Sidade Dili hamutuk 24,” Xefe Ekipa Task Force Diresaun Nasionàl Servisu Água (DNSA) ba Estadu Emerjénsia no Kombate COVID-19, Francisco Afonso, informa ba jornalista TATOLI iha nia serbisu fatin, Colmera, Dili, tersa ne’e.

Nia hatutan, profil 40 ne’e apoiu husi parseiru internasionál sira inklui ho besi, torneira no osan balun ne’ebé ekipa task force husi DNSA mak ajuda monta profil ba fatin públiku.

“DNSA ho parseiru internasionál foin mak monta profil iha munisípiu haat (4) hanesan Baucau, Maliana, Ermera no Liquiça. Munisipiu seluk seidauk tanba DNSA seidauk simu karta ruma hosi autoridade munisípiu. Tanba ne’e hein de’it bainhira munisipál presiza, DNSA sei tún hodi ajuda materiál hanesan besi no profil ka tanke fase liman nian,” nia hateten.

Nia informa, profil 40 ne’e hetan apoiu hosi Plan Internasionál hamutuk neen (6), Australia hamutuk 14 no UNICEF hamutuk 20 inklui ho osan balun. Parseiru sira mak durante ne’e halo survei ba fatin ne’ebé atu monta profil fase liman nian, hafoin hato’o ba ekipa task force mak foin hamutuk ba monta.

“Ami-nia serbisu mak prontu atu asegura no kontribui ba Estadu Emerjénsia no ba kombate surtu COVID-19 nian. Tanba ne’e, atu aumenta loron 30 mós ami nafatin mantein serbisu ne’ebé mak hetan autorizasaun husi leten,” nia dehan.

DNSA Entrega Profil ba Munisípiu

Entretantu, ohin, nia infroma, ekipa task force Diresaun Nasionàl Servisu Água (DNSA) entrega tanke ka profil hamutuk neen (6) ba komunidade sira iha Munisípiu Ermera no Liquiça.

“Ohin, ami-nia ekipa task force entrega tanke ka profil hamutuk neen (6) ba ita-nia komunidade sira iha Munisípiu rua hanesan Ermera no Liquiça. Husi profil neen (6) ne’e, profil haat (4) entrega ba Munisípiu Ermera no rua (2) seluk entrega ba Liquiça,” nia hateten.

Nia hatutan, profil ne’e parte husi prezidente autoridade sira husi munisípiu mak rekomenda karta hodi ekipa task force ajuda monta iha fatin públiku hodi komunidade hotu bele asesu.

“Relasiona ho moras Covid-19, ita-nia autoridade munisípiu haruka karta, nune’e ami ekipa task force husi DNSA ho parseiru internasionál hanesan Australia, Plan no UNICEF atu bele fasilita komunidade sira,” nia dehan.

Notísia Relevante: Ekipa Task Force DNSA Laiha Ekipamentu Protesaun

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here