Provedora Direitu Umanu no Justisa (PDHJ), Jesuína Maria Ferreira Gomes. Imajen Tatoli/ Egas Cristóvão

DILI, 21 abríl 2020 (TATOLI) – Durante implementasaun Estadu Emerjénsia (EE), hahú hosi loron 27 marsu 2020 to’o ohin loron,  Provedoria Direitu Umanu no Justisa (PDHJ) rejista kaixa violasaun direitu umanu no sala implementasaun EE hamutuk hitu (7).

Notísia Relevante : PDHJ Husu PNTL ho F-FDTL Atua Tuir Regra Estadu Emerjénsia 

Provedora Jesuína Maria Ferreira Gomes, ohin, informa, keixa hirak-ne’e, kompostu hosi kazu indísiu violasaun direitu umanu lima (5) ne’ebé komete hosi membru Polísia Nasionál Timor-Leste (PNTL) balun hodi uza forsa halo agresaun fíziku hasoru komunidade iha Munisípiu Dili, Bobonaro (Maliana) ho Covalima  (Suai Loro).

Ba keixa rua (2) seluk, Provedora Jesuína Maria Ferreira Gomes, hateten,  iha implementasaun estadu emerjénsia ba loron dahuluk nian autoridade seguransa sala halo interpretasaun ba implementasaun dekretu governu númeru 3/2020 hodi haruka taka atividade komersiaís balun iha Dili.

Provedora Jesuína Maria Ferreira Gomes, ba Ajénsia Tatoli iha nia serbisu fatin, Caicoli, Dili,  hateten, atuasaun membru PNTL  balun uza forsa ne’e tanba joven sira halibur malu iha dalan konta istória no loza balun la kumpre regra hodi kria fasilidade fase-liman. Maibé, tuir loloos labele uza forsa, tanba Polísia nia-kna’ar iha estadu emerjénsia atu halo aproximasaun fó hanoin ba komunidade  hodi kumpre regra sira hodi halo prevensaun.

“Iha keixa ho evidénsia sira komunidade hatudu no aprezenta mai hetan agresaun fíziku hodi rezulta isin bubu no kanek,” tenik Jesuína Maria Ferreira Gomes.

PDHJ sei haruka keixa ne’ebé komete hosi indivíduu violasaun direitu umanu ba Primeiru-Ministru hodi foti asaun prevensaun ka fó hanoin ba Ministériu Interior no Komandu Jerál PNTL atu evita asaun sira ne’ebé atua la tuir regra estadu emerjénsia no vila ema nia direitu moris no direitu fundamentu.

Jornalista : Nelson de Sousa

Editór       : Francisco Simões

 

 

HAKEREK NO HATÁN

Please enter your comment!
Please enter your name here