Xefe Ekipa Task Force Servisu Água no Saneamentu (SAS) ba Kombate COVID-19, Francisco Afonso.

DILI, 21 abril 2020 (TATOLI)–Xefe Ekipa Task Force Servisu Água no Saneamentu (SAS) ba Kombate COVID-19, Francisco Afonso informa, ekipa task force Diresaun Nasionàl Servisu Água (DNSA) laiha ekipamentu protesaun ne’ebé dalaruma difikulta sira-nia serbisu bainhira hala’o serbisu iha terrenu liuliu monta profil iha kuarentena sira.

“Ami ekipa task force sempre prontu asegura no kontribui ba prevensaun COVID-19 iha terenu bainhira hetan autorizasaun hosi parte kompetente. Maibé defikuldade boot ne’ebé mak ami enfrenta mak laiha ekipamentu protesaun hodi proteje ami-nia an hodi halo serbisu hanesan monta profil iha kuarentena,” dehan Francisco Afonso, ba Ajénsia TATOLI iha nia serbisu fatin, Colmera, Dili, tersa ne’e.

Ekipamentu protesaun ne’ebé sira uza daudaun ne’e, nia hateten, sira-nia ekipa mak sosa rasik tanba bainhira halo serbisu iha terrenu sira presiza ekipamentu protesaun hodi bele utiliza no proteje an.

“Durante ne’e, sasán ne’ebé mak ami uza ne’e ami mak sosa rasik. Tanba, ami mós presiza iha protesaun ba ami-nia isin.  Tanba, dalabarak ami ba monta profil iha kuarentena iha Dili laran ne’ebé mak Governu aluga no oferese ba abitante sira hosi nasaun afetadu sira,” nia subliña.

Antes ne’e, nia haktuir, iha inundasaun ne’ebé afeta kuaze komunidade barak mak la asesu ba bee-moos tanba mota halo kotu kanu, ekipa task force ne’e kontinua serbisu hodi ajuda komunidade sira ne’ebé presiza bee no tenke fase liman.

“Ami ho kolega sira halo ami-nia serbisu funsiona kedas iha inundasaun to’o mai Estadu Emerjénsia no sei prolonga tan loron 30. Tanba ne’e, ami mós presiza ekipamentu protesaun hanesan máskara no luvas,” nia sujere.

Maski nune’e, xefe ekipa task force ne’e hateten, nia parte husu nafatin ba Maromak atu tulun no proteje sira hosi moras COVID-19  ne’e, nune’e sira bele atende komunidade sira.

Notísia Relevente: Ekipa Task Force SAS Sei Monta Tan Profil iha Kuarentena

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here