Prezidente Tribunal Rekursu, Deolindo dos Santos. Imajen Tatoli/Antonio Goncalves

DILI, 21 abril 2020 (TATOLI)–Prezidente Tribunál Rekursu (PTR), Deolindo dos Santos, ohin, relata funsionamentu tribunal ba Prezidente Repúblika, Francisco Guterres “Lú Olo”, katak durante Estadu Emerjénsia (EE) tribunál sira funsiona ho forma ne’ebé limitadu hodi konsidera de’it julgamentu ba kazu sira ne’ebé importante.

“Iha enkontru loron ohin nian ko’alia liu kona-ba oinsá funsionamentu Tribunál durante estadu Emerjénsia. Ha’u hato’o ba Prezidente Repúblika katak, durante Estadu Emerjénsia, Tribunál funsiona ho forma ne’ebé limitadu. Signifika, tribunál labele taka totál maibé funsiona nafatin no funsiona de’it ba buat sira ne’ebé Tribunál kinsidera katak urjente liuliu prosesu kazu sira ne’ebé importante no urjente,” dehan Deolindo dos Santos ba jornalista sira hafoin hala’o enkontru mensál ho Prezidente Repúblika iha Palásiu Prezidensiál, Bairru Pité, Dili. ,

Nia fó ezemplu, hanesan prosesu sira ne’ebé maka arguidu prezu, iha prosesu sivil karik, sira ne’ebé tama iha prosesu kautelar no mós prosesu balun ne’ebé maka, juiz sira konsidera katak bele iha perigu persegisaun ba prosedimentu kriminál no seluk tan.

“Ida ne’e mak hala’o nafatin. Maibé, ba prosesu sira ne’ebé mak lahó karatér urjente Tribunál la hala’o. Maski ho forma ne’ebé limitadu, Tribunál kontinua funsiona atu bele atende hodi fo justisa ba maluk sira ne’ebé presija iha desizaun,” nia subliña.

Tribunál funsiona ho forma ne’ebé limitadu tebes, nia esplika, tanba hafoin Prezidente Repúblika dekreta Estadu Emerjénsia, nu’udár Prezidente Tribunál Rekursu Deolindo lori mós kestaun ne’e ba Konsellu Superiór majislatura judisiál no deside atu límite serbisu oinsá labele fó perigu ba vida juiz sira-nian, ofisiál justisa no funsionáriu sira.

“Ida ne’e mak ami deside. Nune’e, julgamentu ne’e lao de’it ho prosesu sira ne’ebé urjente. Maski ho ida ne’e de’it maibé fó hanoin ba maluk sira ne’ebé mak tuir julgamentu ne’e, ami husu atu labele barak. Ba ema ne’ebé mak iha interese direta ba prosesu ne’e mak bele ba no sira ne’ebé la iha interese direta labele ba, tanba ita ko’alia kona-ba vida ema-nian. Aleinde ne’e, prosesu sira ne’ebé mak uluk la’o normál iha distritu sira, antes ne’e koñesidu ho Tribunál movel. No, ha’u hato’o ba Prezidente Repúblika katak durante Estadu Emerjénsia la funsiona (paradu) no bainhira situasaun normal ami halo fali,” nia dehan.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here