Portavóz Gabinete Sentru Integradu Jestaun Krize (CIGC-sigla Portugés), Sergio Lobo.Imajen/Egas Cristovao

DILI, 21 abríl 2020 (TATOLI)-Governu liuhosi Sala Situasaun Sentru Integradu Jestaun Krize (CIGC-sigla portugés) rekoiñese kontribuisaun hosi Timoroan sira iha Kuarentena obrigatóriu tanba fó ona apoiu ba Governu hodi prevene transmisaun surtu COVId-19 iha Timor-Leste.

Iha konférensia imprensa tersa (21/04/2020), Portavóz CIGC, Sergio Lobo, afirma Timoroan lubuk ida maka sakrifika sira-nia an hodi kumpre kuarentena obrigatóriu durante loron 14 tanba de’it hakarak fó apoiu ba governu hodi prevene moras coronavirus.

Doutór Sergio Lobo hato’o asuntu ne’e relasiona ho asaun protestu hosi Abitante Kuarentena Otél Lecidere hasoru médiku sira.

“Ita sira iha li’ur ne’e bele imajina kondisaun estres ne’ebé ita-nia maluk sira iha kuarentena sente, ho nune’e mak ita tenki valoriza no apresia sakrifisiu bo’ot ne’ebé sira halo durante ne’e ba nasaun no povu,” dehan Eis Ministru-Saúde, Sergio Lobo, iha Sentru Konvensaun Dili,tersa ohin.

Atu suporta sira hodi ultrapasa situasaun ne’e, Eis Governante ne’e husu Inan-Aman, no Família idaidak atu fó nafatin korajén ba sira atu nune’e bele aguenta to’o data hodi re-integra fila-fali ba komunidade.

“Sé ita husik sira sai agora mak ema ida hetan hela pozitivu nia sei lori susar bo’ot ba nia família no komunidade tomak, dala ida tan husu ita hotu nia komprensaun maluk sira iha kuarentena no sira nia família hotu,” tenik Sergio Lobo.

Kona-ba dezentendimentu ne’ebé mosu entre abitante otél Lecidere ho médiku sira segunda horiseik, nia esplika kazu ne’e akontese bainhira atu halo tranferénsia abitante hirak ne’e ba otél seluk hafoin deteta na’in ida hosi sira pozitivu COVID-19.

Hosi ema na’in 41 iha Otél Lecidere, abitante 17 koloka ba otél Yekiu, na’in 17 ba iha Otél Viana, Na’in neen ba Kuarentena Tibar no na’in ida ne’ebé pozitivu ne’e lori ona ba Fatin Izolamentu Sentru Vera Cruz Dili.

Jornalista  : Hortencio Sanchez

Editór        : Agapito dos Santos

HAKEREK NO HATÁN

Please enter your comment!
Please enter your name here