Prezidente Repúblika,Francisco Guterres Lú Olo. Imajen Tatoli/António Gonçalves

DILI, 21 abril 2020 (TATOLI)–Prezidente Repúblika, Francisco Guterres “Lú Olo”, aban, sei prezide reuniaun Konsellu Estadu (KE) no Konsellu Superior Defeza no Seguransa (KSDS) hodi rona hanoin sira kona-ba proposta Governu ba estensaun estadu emerjénsia.

Tuir komunikadu ne’ebé Ajénsia TATOLI asesu hosi Prezidénsia Repúblika hateten, Estadu emerjénsia ne’ebé Prezidente Repúblika dekreta iha 27 marsu sei remata iha 26 abril 2020 maibé haree ba situasaun surtu COVID-19 iha Timor-Leste ho kazu konfirmadu hamutuk 23 no rekuperadu ida (1), Governu hato’o proposta estensaun estadu emerjénsia nu’udar dalan di’ak liu ba prevensaun no kombate moras aat ne’e.

Governu propoin estensaun estadu emerjénsia ba fulan ida tan, hahú husi 27 abril-26 maiu 2020. Governu hatama proposta estensaun estadu emerjénsia ne’e atu fó protesaun ba saúde públika iha Repúblika Demokrátika Timor-Leste.

Tanba, tuir komunikadu ne’e hateten, Coronavirus (COVID-19) nu’udar pandemia nune’e presiza medida preventiva lalais atu la hada’et moras aat ne’e ba beibeik no hamate ema barak.

Hafoin rona hanoin sira husi Konsellu Estadu no Konsellu Superior Defeza no Seguransa mak Prezidente Repúblika sei foti desizasaun. Molok dekreta estadu emerjénsia, Prezidente Repúblika sei husu autorizasaun hosi Parlamentu Nasionál no bainhira Parlamentu Nasionál autoriza, Prezidente Repúblika sei dekreta estadu emerjénsia.

Iha 27 marsu, Prezidente Repúblika deklara estadu emerjénsia ho fundamentu hadook ema hotu-hotu ne’ebé hela iha Timor-Leste hosi kalamidade públika ne’ebé mosu husi COVID-19 no deklarasaun estadu emerjénsia ne’e abranje territóriu nasionál tomak.

Pandemia COVID-19 iha Estadu Membru ASEAN ninian hada’et ema liu rihun 27 no ema mate liu rihun ida. Mundialmente, iha ema hamutuk rihun 168 ne’ebé mate no hada’et ba ema liu millaun rua (2).

Notísia Relevente: Governu Solisita Prezidente Repúblika Estende Tan Períodu Estadu Emerjénsia

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here