Atividade petrolífera. Imajen/Observador

DILI, 20 abríl 2020 (TATOLI) – Diretór Operasaun Kompañia Timor Resources Pty.Ltd, Luís Pereira, informa maski empreza hahú halo preparasaun tanba mákina Drilling rig atu halo perfurasaun mina-matan to’o no hatun ona iha Suai, maibé ofisialmente atividade hotu iha Kosta Súl suspende provizóriu tanba Timor-Leste iha períodu Estadu Emerjénsia kauza husi surtu COVID-19.

“Ami suspende ofisiál ami ninia aktividade ba instalasaun ka monta mákina perfurasaun mina-matan iha rai-maran tanba ita-nia tékniku no enjeñeiru sira labele mai iha Timor-Leste tanba iha períodu Estadu Emerjénsia no surtu COVID-19”, dehan Diretór Luís ba Tatoli via telefónika, segunda ne’e.

Nia adianta, iha períodu ne’e enjeñeiru no tékniku sira kuaze husi Indonézia, Amérika, Nova Zelandia no Austrália labele mai hala’o instalasaun ba mákina, nune’e deside suspende atividade ne’e iha semana ida liubá ona.

“To’o agora ita suspende lai ita-nia preparasaun no instalasaun mákina ne’e no hein lai to’o Estadu Emerjénsia ne’e hotu tiha lai mak halo fali instalasaun, tanba sasán ne’e todan, ne’ebé tékniku sira mai monta maizumenus fulan-ida hanesan ne’e maka bele hotu, hafoin halo teste no Autoridade Nasionál Petróleu no Minerál (ANPM) mai halo verifikasaun hotu mak foin halo perfurasaun”, nia afirma.

Kona-ba loron atu hahú perfurasaun, to’o agora seidauk iha serteza tanba antes ne’e bainhira seidauk iha surtu no Prezidente Repúblika seidauk dekreta Estadu Emerjénsia, planu atu hahú perfurasaun iha fulan-jullu tinan ne’e.

“Ita planu atu fura posu dahuluk iha loron jullu, maibé Estadu Emerjénsia ne’ebé fó impkatu ba kompañia hotu ne’ebé tékniku sira mós labele mai tanba sidadaun estranjeiru labele tama mai iha Timor-Leste”, nia akresenta.

Tuir planu, Empreza Timor Recourses hakarak hala’o foku uluk ba posu dahuluk ho naran Karau ne’ebé lokaliza iha Suku Matai, Postu Administrativu Maucatar, Munisípiu Kovalima, ho durasaun ba instalasaun no perfuransaun kuaze loron 40.

Hafoin ida-ne’e mak muda fali ba posu daruak lokaliza iha Aldeia Sanfuc, Suku Camenaça, Postu Administrativu Suai Villa, Munisípiu  Kovalima

“Agora ema husi li’ur mós tauk hotu COVID-19,  ne’ebé atu tama mai iha Timor-Leste mós fronteira taka hotu. Tanba ne’e ofisialmente hapara aktividade ne’e to’o Estadu Emerjénsia ita-nia ramata no mós COVID-19 ne’e laiha mak bele hahú instalasaun no perfurasaun”, nia salienta.

Kuandu Timor-Leste termina ona períodu Estadu Emerjénsia, maibé nasaun ne’ebé tékniku sira mai ne’e mak kontinua la autoriza nia emar sai tanba COVID-19, presiza hein to’o Pandemia globál ne’e ramata.

“Ita seidauk iha loron fiksu ida bainhira mak ita halo instalasaun no perfurasaun tanba COVID-19 ne’e ita seidauk hatene to’o bainhira mak hotu,” nia adianta.

Atividade perfurasaun mina-matan ne’e, Timor Recourses halo parseiru ho TIMOR-GAP.

Antes ne’e, Vise-Prezidente ANPM ba asuntu Esplorasaun Minerál, José Gonçalves, informa iha inísiu fulan-abríl nia-laran, Kompañia Timor Resources Pty.Ltd husi Austrália ho ninia parseiru Timor GAP,EP hahú preparasaun ba perfurasaun mina-matan lima iha rai-maran, iha área Kosta Súl, área Suai, Kovalima  Betano, no Manufahi nian.

José Gonçalves adianta, parte autoridade kontinua akompaña nafatin atividade kompañia sira iha terrenu tanba antes halo perfurasaun iha ona peskiza jeofízika ho sistema sízmiku no magnétiku ne’ebé ekonomikamente no téknikamente viavél atu halo perfurasaun.

Ho nune’e, nia iha esperansa molok tinan-2020 nia rohan bele hetan ona novidade di’ak husi rezultadu perfurasaun hodi bele prepara dezenvolve kampu ne’e, liuliu halo esplorasaun.

Antes ne’e, Prezidente Timor GAP, Francisco Monteiro, informa iha tinan-2020, hamutuk ho Kompañia Timor Resources sei halo perfurasaun ba mina-matan iha rai-maran área Suai- Kovalima, Betano no Manufahi.

Tuir responsável ne’e, atu halo perfurasaun kustu karun, ne’ebé tenke atrai ema seluk mai hodi investe hamutuk atubele halo atividade iha bloku eskluzivu nian.

Bloku lima ne’e hahú iha tinan-2017, halo peskiza jeolójiku no estudu sira seluk no iha fulan-outubru 2018 hala’o ona teste sízmiku sira iha Bloku A.

Empreza uza ona sistema vibroseis, ne’ebé hanesan alternativu ida kontroladu hosi teste sízmiku sira.

Enkuantu bloku C hala’o ona teste sira iha outubru, iha zona Betano (entre Alas ho Hatudu) no teste vibroseis sira.

Nia subliña, planu atuál haree ba perfurasaun tolu to’o lima iha Bloku A no ida-idak hosi perfurasaun tolu iha shallow-field to’o metru 2.000 no sei kusta millaun $35.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here