Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen Tatoli/Egas Cristovão

DILI, 20 abríl 2020 (TATOLI) – Liuhosi Sala Situasaun, Portavóz Sentru Integradu Jestaun Krize (CIGC, sigla portugés), Rui Maria de Araújo, informa, Timor-Leste rejista tan kazu konfirmadu foun ka pozitivu COVID-19 hamutuk na’in-tolu.

“Totál kazu konfirmadu sa’e ba 22, kazu foun husi orseik mai ohin iha kazu foun tolu. Totál kazu rekuperadu laiha mudansa, ida nafatin”, dehan Portavóz iha Sala Sentru Mídia COVID-19, iha Sentru Konvensaun Dili (CCD, sigla portugés), segunda ne’e.

Eis Ministru Saúde ne’e salienta, kazu konfirmadu no provável iha Timor-Leste sei nafatin restritu ba grupu ka klaster hanesan, maibé aumenta tan grupu rua kompara ho loron rua liubá.

Grupu foun mak kuarentena Otél Lecidere no Grupu Profesór Portugés sira iha Liquiçá.

Enkuantu grupu seluk ne’ebé rejista ona kazu konfirmadu no provável maihosi kuarentena iha Otél Katuas, Otél Fortuna no Otél Novo Horizonte.

Atuál Koordenadór Ligasaun Ofisiál ba Forsa Tarefa COVID-19 ne’e esplika, totál kazu suspeitu iha 327, enkuantu orseik iha 323, totál kazu provável iha na’in-lima, husi orseik mai ohin aumenta ida.

Totál rezultadu laboratóriu seidauk hatene iha 92, totál rezultadu laboratóriu negativu nafatin laiha mudansa iha 208.

Nune’e mós, totál ema iha kuarentena daudaun ne’e iha 597, husi númeru ne’e iha 15 maka auto-kuarentena iha munisípiu, 474 maka kuarentena iha fasilidade ne’ebé Governu estabele iha Dili, 108 iha fasilidade Governu iha iha munisípiu sira.

“Husi sira ne’ebé kuarentena iha 23 maka profisionál saúde no sira mai husi grupu ema ne’ebé durante ne’e fó asisténsia iha fatin kuarentena sira no mós fatin izolamentu iha Vera Cruz”, nia akresenta.

Portavóz CIGC adianta, ema hamutuk na’in-27, kompostu husi konfirmadu na’in-22 no provável na’in-lima, oras ne’e iha hotu Vera Cruz iha fatin ketak-ketak, konfirmadu ketak no provável ketak.

“Ekipa médiku halo nafatin akompañamentu ba sira ne’ebé iha sintoma, médiku sira halo tratamentu ho ai-moruk sintomátiku no ba sira ne’ebé laiha sintoma nafatin monotoriza no observa loron-loron. Iha mós akompañamentu esperituál no psikolójiku online liuhosi whatsapp ba sira”, nia realsa.

Jornalista: Natalino Costa

Editora: Julia Chatarina

1 KOMENTÁRIU

  1. Lor-loron Aumenta nafatin 1, 2, ou 3 too fulan maio hanesan ne ESTADO DE EMERJENSIA mos Aumenta tan too Fulan Julho.

HAKEREK NO HATÁN

Please enter your comment!
Please enter your name here