Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 20 abríl 2020 (TATOLI) – Portavóz Sentru Integradu Jestaun Krize (CIGC, sigla portugés), Rui Maria de Araújo, informa sidadaun ida, ne’ebé halai husi Sentru Saúde Comoro bainhira halo konsulta hatudu sintoma infesaun respiratóriu aguda, ne’ebé atu hanesan sintoma ba COVID-19.

Iha loron hirak liubá, iha sidadaun ida halo konsulta iha Sentru Saúde Comoro, no iha momentu ne’ebá médiku sira informa katak nia iha sintoma atu hanesan COVID-19, tanba ne’e nia tauk no halai.

“Nia hatudu duni sintoma infesaun respiratóriu aguda no oras ne’e daudaun nia auto-karantina iha uma no sira hasai ona ninian spesimen atu halo analiza hafoin ita akompaña”, dehan Portavóz liuhosi konferénsia imprensa iha Sentru Mídia COVID-19, iha Sentru Konvensaun Dili (CCD, sigla portugés), segunda ne’e.

Atuál Koordenadór Ligasaun Ofisiál ba Forsa Tarefa COVID-19 ne’e haktuir, bainhira rona sidadaun ne’e lakohi koopera ho ekipa saúde, maka ekipa vijilánsia epidemiolójika tuir kedan ba ninia uma.

“Haree kedan nia iha uma no halo entrevista ho nia. Husi entrevista ne’e nia laiha kontaktu. Signifika laiha ema ne’ebé maihusi fatin risku, ne’ebé depois iha kontaktu prósimu ho nia no laiha mós ema ne’ebé konfirmadu ona maka iha kontaktu ho nia”, nia akresenta.

Eis Ministru Saúde ne’e esplika, razaun nia halo auto-karantina iha uma tanba nia kontaktu laiha, tanba ne’e buat ne’ebé konsidera hanesan kritériu epidemiolójiku nia la priense maibé nia priense maka kritériu klíniku.

“Signifika nia iha sintoma ne’ebé hanesan ho moras COVID-19, maibé ne’e sintoma jenériku ka sintoma ne’ebé maka jerál hanesan hatudu mós ba infesaun respiratóriu aguda bain-bain”, nia subliña.

Tanba ne’e, daudaun ekipa foti ona teste no nia nafatin iha uma.

“Ita akonsella nian labele la’o sai arbiru lai, uza maskara nafatin, mantein nafatin ijiene pesoál to’o rezultadu analiza nian sai”, nia salienta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here