Reprezentante Unicef iha Timor Leste, Valérie Taton Hamutuk ho Diretora Jerál Prestasaun Servisu Saúde, Odete Viegas Unicef no Ministerio Saude Asina Termo Entrega ba Ekipamento. Imajen/Egas Cristovão

DILI, 20 abríl 2020 (TATOLI)-Parseiru Dezenvolvimentu kompostu husi UNICEF ho Uniaun Europeia, segunda (20/04/2020), oferese ona ekipamentu hanesan kama 28, armari, kadeira no seluk tan ba Ministériu Saúde hodi atende kazu surtu COVID-19 iha Timor-Leste.

Reprezentante UNICEF iha Timor-Leste, Valérie Taton, maka entrega diretamente ekipamentu hirak ne’e ba Ministériu Saúde ne’ebé reprezenta husi Diretóra Jerál Prestasaun Servisu, Odete Viegas da Silva iha armazén Bebora, segunda ohin.

”Ekipamentu hirak ne’ebé mak ita-nia parseiru sira  fó doasaun mak hanesan kama, armari, trolley, toa, kadeira roda, no sasan hirak  ne’e ba fatin izolamentu nian,’’ esplika atuál Portavóz Sala Situasaun Sentru Integradu Jestaun Krize (CIGC-sigla portugés) ne’e.

Alende ne’e, Organizasaun Internasionál rua ne’e mós oferese kolxaun, sumasu, lensól hodi responde nesesidade sira iha sala izolamentu.

Tuir planu hosi kama 28 ne’e, kama ualu sei tau iha fatin izolamentu Sentru Saúde Vera Cruz Dili no restu sei rai iha fatin kuarentena Tasi-Tolu no Tibar.

Odete Viegas da Silva, lori Governu konstitusionál daualu nian naran hato’o agradese ba UNICEF ho Uniaun Europeia tanba hakma’an ona responsabilidade Governu nian hodi atende kazu COVID-19.

”Ita espera katak apoiu sira husi  parseiru sira hanesn ne’e iha nafatin kontribui ba iha dezenvolvimentu liu-liu ba área saúde nian oinsá ita bele atende COVID-19 ne’ebé mak agora daudaun sai ona ameasa iha ita-nia rain maibé ita nafatin servisu hamutuk  mak ita bele utrapasa situasaun defisil sira ne’e,’’tenik Doutóra Odete.

Iha fatin hanesan, Reprezentante UNICEF iha TL, Valérie Taton espera ho tulun ne’e sei rezolve ona situasaun balun ne’ebé daudaun ne’e Governu infrenta hela.

“Ami espera  bele buka tan sasan médiku sira nian ba Governu no ami mós buka atu identifika folin sasán iha merkadu globál sira,” katak Valérie Taton.

Ekipamentu hirak ne’e UNICEF ho UE sosa ho osan pruvolta rihun $ 100 resin, inklui mós komunikasaun ne’ebé ohin entrega ba Governu.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here