Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen Tatoli/Egas Cristovão

DILI, 20 abríl 2020 (TATOLI) – Daudaun ne’e Timor-Leste rejista ona kazu konfirmadu COVID-19 hamutuk 22, kazu foun ba loron ohin tolu no rekuperadu ida, maibé husi kazu konfirmadu pozitivu sira hotu konsidera hanesan kazu lijeiru ka kmaan.

Liuhosi Sala Situsaun, Portavóz Sentru Integradu Jestaun Krize (CIGC, sigla portugés), Rui Maria de Araújo, informa Governu liuhosi Ministériu Saúde, hamutuk ho Gabinete Jestaun Krize sei halo preparasaun bainhira akontese kazu grave iha Timor-Leste, hodi envolve mós espesialista sira.

“Agora dadaun kazu konfirmadu aumeta maibé hanesan ita hatene kazu sira ne’ebé maka iha kazu lijeiru hotu. Preparasaun ne’ebé Ministériu Saúde halo liuhosi koordenasaun ho Sala Situasaun, atu haree bainhira ita tama iha faze ne’ebé kazu grave iha, entaun ita presiza envolve espesialista seluk ne’ebé daudaun servisu iha Timor-Leste, iklui mós brigada médika Kubanu sira ne’ebé iha”, dehan Portavóz liuhosi konferénsia imprensa iha Sentru Mídia COVID-19, iha Sentru Konvensaun Dili (CCD, sigla portugés), segunda ne’e.

Tuir atuál Koordenadór Ligasaun Ofisiál ba Forsa Tarefa COVID-19 ne’e, daudaun Governu antisipa hela bainhira senáriu ne’ebé mesiona ne’e mosu.

“Preparasaun la’o hela ba senáriu sira ne’ebé sei mosu mai”, nia subliña.

Entretantu, totál kazu suspeitu daudaun ne’e rejista iha 327, enkuantu orseik iha 323, totál kazu provável iha na’in-lima, husi orseik mai ohin aumenta ida.

Totál rezultadu laboratóriu seidauk hatene iha 92, totál rezultadu laboratóriu negativu, nafatin laiha mudansa iha 208.

Nune’e mós, totál ema iha kuarentena daudaun ne’e iha 597, husi númeru ne’e iha 15 maka auto-kuarentena iha munisípiu, 474 maka kuarentena iha fasilidade ne’ebé Governu estabele iha Dili, 108 iha fasilidade Governu iha munisípiu sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here