Albertina Pereira, vendedora kioske. Imajen Tatoli/Osória Marques

DILI, 20 abríl (TATOLI)–Komunidade preokupa ho prolongamentu Estadu Emerjénsia tanba povu baibain susar atu hetan osan hodi sustenta família uma-laran.

“Estadu no Governu ida-ne’e atu prolonga tan Estadu Emerjénsia maibé hanoin mós ami povu nia terus no hamlaha. Estadu mós tenke hanoin povu nia nesesidade. Karik bele fó netik hahán ruma hodi ami garantia no tuur hakmatek no kumpre regra Estadu Emerjénsia”, dehan Lamberto dos Rosário, motorista mikrolete, ba Agência TATOLI iha nia rezidénsia, Lurumata, Suku Fatuhada, Postu Administrativu Dom Aleixo, Munisípiu Dili, segunda ne’e.

Tuir kondutór ne’e katak Estadu Emerjénsia ne’e ba fulan ida de’it karik bele augenta ho hahán ne’ebé mak sira prepara antes.

Isabel Pinto, vendedora modo. Imajen Tatoli/Osória Marques

“Ha’u hanoin ita-nia Estadu Timor-Leste dekreta Estadu Emerjénsia ne’e ba fulan ida de’it entaun hahán ne’ebé ami prepara ne’e sufisiente hela ba ami. Maibé, bainhira Estadu prolonga tan mak ha’u dehan loloos de’it katak susar tebes ba ha’u pesoál ne’e, tanba ami-nia moris iha estrada leten mak lori kareta hodi buka osan loron-loron hodi sustenta nesesidade bázika”, nia hateten ho triste.

Komisaun Interministeriál Deside Estende Estadu Emerjénsia ba Loron 30 Tan

Lamberto haktuir katak situasaun agora ne’e ema hotu tauk no pániku maibé tauk ba coronavirus (Covid-19) ka polítika entre nai-ulun sira hodi hamosu krize ekonomia ne’ebé povu mak simu rezultadu hamlaha, terus no sofre.

“Ita konfuzaun ho situasaun agora iha Timor-Leste ne’e tanba ami povu ki’ik lahatene ita atu tauk covid-19 ka tauk krize ekonómia ne’ebé ami povu mak tenke simu rezultadu hamlaha,  terús no sofre”, nia akresenta.

Lamberto do Rosário, motorista mikrolete. Imajen Tatoli/Osória Marques

Entretantu, Albertina Pereira, vendedora kioske, hateten sira halo tuir de’it saida mak Governu haruka katak Estadu Emerjénsia tenke hakmatek no labele la’o arbiru.

“Ami halo tuir de’it saida mak ita-nia Governu haruka dehan loke kioske ami loke maibé Governu dehan taka ami mós taka tanba tauk moras coronavirus ne’e. La’ós ami de’it mak tauk atu loke kioske maibé kompradór sira mós tauk la mai sosa sasán”, kioske-na’in ne’e haktuir.

Albertina dehan bainhira seidauk aplika Estadu Emerjénsia, kioske ne’e folin liu tanba loron ida bele hetan $100-200 maibé agora la folin. Dalaruma loron ida nein hetan osan.

“Ami-nia kioske uluk loron ida ami hetan to’o $100-200 maibé kuandu aplika tiha Estadu Emerjénsia ami la hetan osan. Ita tauk Governu nia liafuan ne’ebé fó-sai katak tenke kumpre regra, ne’ebé ha’u hanoin Governu aumenta fulan ida tan ami halo tuir de’it ona tanba moras ne’e perigu ba ema-nia vida”, nia esklarese.

Aleinde ne’e, Isabel Pinto, negosiante modo informa maski Estadu dekreta Estadu Emerjénsia maibé nia kontinua fa’an modo nune’e sustenta labarik sira-nia presiza no hahán loron-loron nian.

“Estadu Emerjénsia ne’e dehan ita labele la’o maibé ami han saida no labarik sira-nia presiza loron-loron ne’e foti husi ne’ebé mak bele nesesita. Tanba ne’e, ha’u tenke fa’an maski Estadu Emerjénsia nia laran”, Isabel tenik.

Tuir nia, nesesidade ne’e importante liu. Bainhira loron ida mak la la’o no la fa’an entaun la hetan osan.

“Karik Governu iha subsídiu ruma atu ajuda ami, ami prontu kontribui. Hakmatek ho buat ruma para aguenta han-hemu. Hakmatek mak laiha ajudu ruma hanesan hahán husi Estadu mak ami susar atu halo tuir regra Estadu nian”, nia afirma.

Negosiante modo ne’e haktuir uluk fa’an modo iha merkadu dalaruma loron ida hetan $80 no bainhira modo kompletu bele hetan to’o $100. Agora, $5 de’it mós la hetan no modo mós dodok hotu.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here