Traballadór sira hatun foos iha Portu Dili. Imajen Tatoli/António Gonçalves

DILI, 20 abríl 2020 (TATOLI)–Nasaun Kambodia daudaun ne’e disponivel ona atu esporta foos mai Timor-Leste iha tempu badak hodi responde pedidu Governu Konstitusionál Daualu tanba estoke foos iha armazén Sentru Nasionál Lojístika (CNL-sigla portugés) komesa menus.

Ministru Negósiu Estranjeiru no Kooperasaun (MNEK), Dionísio da Costa Babo Soares, hateten antes ne’e Governu kontaktu nasaun Kambódia ho Vietname hodi husu sira atu esporta foos mai rai-laran, maibé to’o ohin, Vietname seidauk fó resposta ba Governu.

“Agora ita kontaktu direta ne’e mak nasaun rua hanesan Kambódia ho Vietname. Kambódia ko’alia ona ho ita katak sira bele hatama foos mai ita. Se ita aprova ona sei ko’alia ho Sentru Lojístika Nasionál mak trata prosesu hotu,” dehan Babo ba jornalista-sira iha Edifísiu Ministériu Finansa, Ai-tarak-laran  Dili, segunda ne’e.

Planu sosa foos ne’e kategoria emerjénsia hodi nune’e bele asegura estoke foos iha armazén iha fulan hirak tuirmai.

“Ita haree atu sosa foos ne’e emerjénsia, buat hotu Sentru Lojístika Nasionál mak toma konta entaun sira tenke koordena ho Ministériu ne’ebé kompetente para kontrola. Ita tenke iha duni planu kontijénsia para ba fulan hira mai ne’e foos tenke iha,” tenik Dionísio.

Maski nune’e, nia dehan, tuir sujestaun Ministériu Finansa nian katak prosesu sosa foos ne’e tenke fó ba setór privadu sira tanba Governu prepara de’it maka estoke atu halo intervensaun hodi responde situasaun emerjénsia ne’ebé liga ho apoiu sosiál sira.

Aleinde nasaun rua ne’e, Dionísio Babo hatutan Governu mós kontaktu nasaun sira seluk iha Ázia atu importa foos mai Timor-Leste bainhira nasaun rua ne’e la fó resposta pozitivu.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here