Primeiru-Ministru, Taur Matan Ruak prezide reuniaun Konsellu Ministru estraordinária, iha Salaun Ministériu Finansa, Aitarak-Laran, segunda (20/04). Imajen Tatoli/António Gonçalves

DILI, 20 abríl 2020 (TATOLI) – Ezekutivu sira liuhosi reuniaun Konsellu Ministru (KM) estraordinária, solisita ba Prezidente Repúblika, Francisco Guterres ‘Lú Olo’, kona-ba estensaun ba períodu Estadu Emerjénsia, ne’ebé mak sei termina iha loron 26 abríl.

“Nesesidade husi estensaun Estadu Emerjénsia ida ne’e, bazeia ba evolusaun situasaun epidemiolójika, ne’ebé ezije aplikasaun medida estraoridinária sira ho karatér urjente atubele trava pandemia”, relata nota ofisiál ne’ebé Agência Tatoli asesu, hafoin sorumutu ezekutivu ne’ebé hala’o iha Salaun Ministériu Finansa, Aitarak-laran, segunda ne’e.

Notísia Relevante: PR Lú-Olo Dekreta Ona Estadu Emerjénsia Hodi Prevene COVID-19

Entretantu, haree ba nesesidade atu halo distánsiamentu sosiál hodi hamenus propagasaun surtu COVID-19, maka iha sesta liubá, komisaun interministeriál hamutuk ho Sentru Integradu Jestaun Krize (CIGC, sigla portugés) deside estende tan períodu Estadu Emerjénsia ba loron 30.

Iha loron 27 marsu, Prezidente Repúblika deklara Estadu Emerjénsia hafoin Parlamentu Nasionál a-favór ho unanimidade hodi fó autorizasaun ba Xefe Estadu dekreta, nune’e bele halo distansiamentu sosiál, ne’ebé nu’udar meiu ida halo prevensaun ba COVID-19.

Estadu Emerjénsia entre ein vigór iha loron 28 marsu, hahú oras 00:00 to’o 26 abríl 2020, oras 23:59.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here