Primeiru-Ministru, Taur Matan Ruak prezide reuniaun Konsellu Ministru estraordinária, iha Salaun Ministériu Finansa, Aitarak-Laran, segunda (20/04). Imajen Tatoli/António Gonçalves

DILI, 20 abríl 2020 (TATOLI) Governu liuhosi reuniaun Konsellu Ministru (KM) estraordinária, aprova ona planu sosio-ekonómiku atubele hatan ba efeitu negativu sira ne’ebé hetan husi pandemia globál COVID-19 iha ekonomia nasionál.

Governu sei ezekuta rekursu fiskál no monetáriu sira ne’ebé presiza hodi garante lalais katak ekonomia bele la’o nafatin durante krize Coronavírus.

“Estímulu ekonómiku ne’ebé aprova ona esensialmente ho objetivu atu proteje ema hotu, salva empregu sira, mantein ai-han no apoiu ba atividade setór privadu nian”, relata nota ofisiál ne’ebé Agência Tatoli asesu, hafoin reuniaun ezekutivu ne’ebé hala’o iha Salaun Ministériu Finansa, Aitarak-Laran, segunda ne’e.

Planu ne’e refere ba medida estratéjika balun, ne’ebé inklui implementasaun sistema universál ba transferénsia osan, ne’ebé sei garante rendimentu báziku kada fulan ba família hamutuk 214.000, subsídiu maizumenus porsentu 60 husi saláriu mensál funsionáriu sira iha setór formál nian, ne’ebé iha kuarentena ka hela iha uma durante pandemia, hodi hola stoke foos emerjénsia ba fulan-tolu.

Nune’e, atribuisaun subsídiu sira atu garante ligasaun iha rai-laran, inklui garante ligasaun ho transporte aéreu ne’ebé kada semana ida halo operasaun dala-tolu, garante ligasaun médiku no emerjénsia krusiál sira ba Darwin, subsídiu ba transporte marítimu merkadoria ho Ataúru no Oé-Cusse, aumenta oras iha portu marítimu ba oras 24 kada loron, atribuisaun izensaun parsiál no pagamentu konta pre-pagu ahi eletrisidade $15 kada fulan ba kada kliente.

Planu ne’e mós fó izensaun iha pagamentu konta bee, kontribuisaun ba seguransa sosiál no renda ba proriedade Estadu nian, programa kréditu ho taxa reduzida, garantia kréditu ba importadór sira, ba sasán esensiál sira no empréstimu emerjénsia.

Nune’e mós implementasaun programa ida atu aumenta oferta ai-han iha Kosta Súl no medida atu garante disponibilidade fatór sira ba produsaun agríkola, pekuária no peska sira, fornesementu bolsa ba maizumenus estudante timor-oan hamutuk na’in-4.200 iha estranjeiru no subsídiu internet ba estudante sira iha Timor-Leste.

Kustu totál medida ne’e hotu sei proporsionál ba impaktu emerjénsia sanitária sira no medida ekonómika sei dinámiku no sei ajusta durante impaktu ekonómiku la’o hela.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here