EUA repatria nia membru forsa Navál na’in-ida ne’ebé sofre moras denge iha Dili hodi lori bá Japaun. Imajen/ANATL

DILI, 20 abríl 2020 (TATOLI)–Estadu Unidu Amérika (EUA) aluga aviaun Medevac hosi Perth-Austrália mai Dili, Timor-Leste, hodi repatria (lori-fila) nia membru forsa Naval na’in-ida ne’ebé sofre moras.

Notísia Relevante : Ohin, Amerikanu Na’in 14 Fila ba EUA

Aviaun ho rejistrasaun Austrália nian VH-FJQ ne’e, ohin, tun iha Aeroportu Internasionál Prezidente Nicolau dos Reis Lobato, Dili, purvolta tuku 12:00 otl, hodi tula  Forsa Navál EUA nian na’in-ida ne’ebé ho kondisaun moras-denge hodi lori bá fasilidade militár EUA nian.

Aviaun Medevac VH-FJQ Desault Falcon FA50 Perth-Dili estima Dili 0301, lori Forsa Navál EUA nian ne’e bá destinasaun ikus (sasemok ikus)  iha Aeroportu Kadena, Japaun.

Bainhira ajénsia Tatoli konfirma prezensa aviaun Medevac nian ne’e ba Prezidente Administração de Aeroportos e Navegação Aérea de Timor-Leste (ANATL, EP), Romualdo da Silva, rekoñese katak aviaun Medevac VH-FJQ hosi Perth-Australia,  aterrajen duni iha Aeroportu Internasionál Prezidente Nicolau Lobato, Dili, hodi tula sidadaun Amérika nian-ida ne’ebé moras.

“Aviaun Medevac ne’e atu tula duni ema moras. Aviaun ne’e, foin mai tula duni sidadaun Amérika nian-ida hodi lori bá Japaun,” hateten Romualdo da Silva, liuhosi konfirmasaun telefónika ho Agência Tatoli.

Nia dehan, ANATL sempre iha koñesimentu ba aviaun ne’ebé tun iha Timor-Leste, inklui aviaun Medevac ne’ebé husu Flight Approval ba AACTL (Autoridade Aviação Civíl Timor-Leste) depois AACTL estuda no koordena ho ANATL mak aprova aviaun ne’e tama para asegura aviaun ne’e bele aterrajen iha aeroportu Timor-Leste nian.

Moras-Denge

Embaixada Estadu Unidu Amérika  (EUA) iha Timor-Leste liuhosi nia komunikadu imprensa ne’ebé Agência Tatoli asesu relata katak membru ida hosi Forsa Navál EUA – Seabees ne’ebé estasiona iha Timor-Leste hetan moras-denge no nesesita tratamentu médiku adisionál.

Komunikadu ne’e aprofunda mós katak pasiente ne’e sei lori bá fasilidade militár EUA nian. Pasiente ne’e, la’ós suspeita hetan surtu COVID-19 no hala’o ona ezaminasaun médiku nesesáriu antes lori sai.

Seabees no Misaun EUA nian apresia apoiu hotu hosi Governu Timor-Leste, inklui hosi Ministériu Negósiu Estranjeiru no Kooperasaun (MNEC) no autoridade aeroportuária sira ne’ebé fasilita ona voo (sasemok) ne’e.

Forsa Navál EUA – Seabees kontinua sira-nia serbisu ho kolaborasaun ho FALINTIL-Forsa Defeza Timor-Leste hodi tulun timoroan-sira liuhosi konstrusaun ba eskola, klínika no fasilidade saúde sira-seluk.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here