Prezidente Parlamentu Nasionál, Arão Noe de Jesus da Costa Amaral. Imajen /Egas Cristóvão

DILI, 20 abríl 2020 (TATOLI)—Prezidente Parlamentu Nasionál, Arão Noé de Jesus da Costa Amaral, fó hanoin katak bainhira Governu hakarak estende Estadu Emerjénsia entaun tenke aselera ona subsídiu ba populasaun nune’e populasaun labele hamlaha iha implementasaun.

Reprezentante povu ko’alia asuntu ne’e tanba oras ne’e populasaun barak mak halerik ona basá laiha osan atu sustenta família iha Estadu Emerjénsia ne’e.

Prezidente Parlamentu Nasionál ne’e mós preokupa ho situasaun ne’e no simu mós mensajen no lamentasaun barak hosi populasaun, tanba ne’e Governu tenke aselera ona subsídiu.

Lee mós: Subsídiu ba Uma-Kain $100 Durante Estadu Emerjénsia Foin Iha Faze Diskusaun

Arão Noé rekoñese iha lamentasaun barak hosi komunidade liuliu populasaun ne’ebé laiha serbisu tanba susar hetan osan iha Estadu Emerjénsia.

Nia fó ezemplu, populasaun ne’ebé buka-moris liuhosi movimentu transporte públiku hanesan mikrolete no taxi difísil tebes hetan rendimentu iha implementasaun Estadu Emerjénsia.

“Ho Estadu Emerjénsia fulan ida-ne’e sira-nia ekonomia tun tebes. Nesesidade bázika de’it mós sira labele hola tanba salária laiha. Tanba ne’e mak ha’u hanoin, se hakarak estende Estadu Emerjénsia ne’e entaun Governu tenke aselera ona implementasaun subsídiu ba ema sira ne’ebé laiha saláriu, más la’ós ba hotu-hotu”, nia dehan ba jornalista sira, iha Parlamentu Nasionál, segunda ne’e.

Prezidente Parlamentu Nasionál fó hanoin katak di’akliu subsídiu ne’e fó de’it ba ema-sira ne’ebé lakon serbisu no laiha serbisu.

Nia afirma, loloos ne’e rekuperasaun ekonómika ne’e labele ko’alia iha situasaun atuál, maibé koa’lia hafoin finaliza krize Covid-19.

Prezidente Parlamentu Nasionál fó-sai katak kompeténsia autoriza Prezidente Repúblika dekreta Estadu Emerjénsia ne’e liuhusi plenária.

“Plenária mak soberania. Prezidente Parlamentu Nasionál ne’e hanesan potavóz de’it hodi dirije, la’ós ko’alia fali dehan autoriza ka la autoriza”, Arão esklarese.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here