Ekipa Prevensaun COVID-19 RAEOA monta fasilidade fase liman iha sub-rejiaun Oé-Silo, hodi tulun komunidade sira bele fase liman. Imajen/Mídia RAEOA-ZEESM TL

DILI, 20 abríl 2020 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) hahú promove prátika ijiene iha fatin públiku, hodi instala tanke bee iha área fronteira inklui fatin públiku balun iha Oé-Cusse, nune’e bele evita propagasaun surtu COVID-19.

Ekipa Konjunta Servisu Prevensaun COVID-19 Rejiaun Administrativa Espesiál Oé-Cusse Ambeno (RAEOA) iha domingu (19/04) instala tan tanke bee inklui fatin fase liman iha sub-rejiaun Oé-Silo.

“Fasilidade ne’ebé oferese husi Autoridade RAEOA sei sai meiu hodi redús propagasaun  surtu ne’e iha área fronteira, liuliu hodi proteje komunidade iha área refere hodi moris saudável”, refere nota ne’ebé Agência Tatoli asesu iha segunda ne’e.

Antes ne’e, iha loron 4 abríl, Autoridade RAEOA instala fatin fase liman no tanke bee iha merkadu Numbey no Tono no iha loron tuirmai, kuntinua instala fatin fase liman inklui tanke bee iha Merkadu Maumeta, Suku Naimeco.

Nune’e mós, kontinua reforsu nafatin  disponibilidade matéria prima bázika ba komunidade, inklui fornesimentu kombustível hodi kontinua fornese eletrisidade ba RAEOA tomak.

“Ba medida hodi reforsa matéria prima bázika ba komunidade sira hanesan foos no sasán bázika sira seluk, Autóridade RAEAO ho Konsuladu Indonézia iha Oé-Cusse, reforsu mos liña koordenasaun ba mekanizmu tomak kona-ba medida hatama sasán husi Indonezia. Nune’e, iha loron 15 abríl, Autoridade RAEOA autóriza hatama sasán hirak ne’e husi Atambua, Indonézia, husi emprezáriu Oé-Cusse sira”, haktuir nota ne’e.

Autoridade RAEOA kontinua asegura antes sasán hirak ne’e tama Oé-Cusse, tenke hetan dezinfekta husi Ekipa Konjunta Prevensaun COVID-19 RAEOA iha postu Sakato.

Kona-ba fornesimentu kombustível ba jeradór iha Sentru Eletrisidade Inur Sakato, iha loron 14 abríl, Autoridade RAEOA transporta ona mina husi Dili bá Oé-Cusse ho ró Sukses.

“Autoridade RAEOA mós kontinua buka dalan hodi fasilita povu Oé-Cusse sira hodi bele utiliza ró hodi tula nesesidade bazíka  ne’ebe sira presiza loron-loron”, subliña nota ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here