Hakerek nain, Gil Kay-Unu.

Autor: Gil Kay-Unu

Relasiona ho situasaun atuál ne’ebé ita-nian Nasaun enfrenta, liu-liu pandemia COVID-19, ho impase polítika ne’ebé la’o, oras ne’e dau-daun dada ba bei-beik. Situasaun sira ne’e hotu to’o agora ladauk iha serteza kona-ba solusaun ne’ebé maka di’ak iha konjuntura polítika atuál, entaun ida ne’e maka sai hanesan preokupasaun boot ba povu Timor laran tomak no mós ba ema estranjeiru sira ne’ebé iha ita nia Nasaun Timor-Leste.

Ita hotu haree situasaun daudaun ne’e ema estranjeiru sira lubun ne’ebé agora komesa sai husi ita nia Nasaun, ida ne’e la’ós tanba de’it haree ba virus-corona ne’ebé maka daudaun fó ameasa ba mundu, maibé sira mós talvez haree ba parte ita nia estabilidade ou postura polítika ne’ebé komesa halo terus povu durante tinan naruk, tanba governasaun inkompletu, volume dezempregu aumenta no inflasaun kontinua sa’e. Nu’udar jerasaun foun sente triste haree natureza polítika jerasaun tuan sira nian ne’ebé maka nunka fó inspirasaun no ezemplu di’ak ba jerasaun kontinuadór sira iha Nasaun soberania ne’e.

Timor-Leste presiza aprende konflitu polítiku oi-oin hosi dizolusaun Nasaun sira seluk, hanesan mós Nasaun Lugoslavia ne’ebé mak agora daudaun Nasaun ida ne’e  fahe malu ou nakfera ba rua no moris iha susar nia laran, ita mós aprende konflitu husi Nasaun Iraque ho Siria, sira ne’e agora daudaun mós enfrenta konflitu ne’ebé sira nia povu moris la konfortavel, vida ekonomia susar atu dezenvolve, ema barak mate tanba hetan atake oi-oin, oho malu, sunu malu, ikus mai susar atu normaliza fila –fali sira nia situasaun interna.

Alende ne’e ita mós presiza aprende husi Nasaun Italia, maske ohin loron Italia enfrenta pandemia Covid-19 no hamate ema barak maibé antes ne’e ita haree ekonomikamente Nasaun Italia ida ne’e ho karaterístika ne’ebé diferente tebes entre Italia do Norte no Italia Sul. Tanba haree ba parte Italia do Norte, sidadaun maioria moris iha progresu no prosperiedade nia laran, tanba sidadaun parte Italia do Norte iha ninia tradisaun rasik ne’ebé maka forte tebes entre sosiedade nia leet, tanba iha asosiasaun ba vida umana.

Enkuantu iha Italia parte Sul enfrenta problema ba kapitál sosiál, relasaun sosiál, abilidade asosiativa, kultura demokrátika no ispíritu desentralizasaun, buat hirak ne’e difísil ba sira atu dezenvolve, tanba dala barak haree ba tendénsia deskonfiansa sosiál. Haree ba moris di’ak Italia Sul susar boot liu kompara ho Italia Norte. Entaun ida ne’e signifika kapitál sosiál diretamente proporsionál ba duni iha nivel prosperidade ekonomika povu Italia norte. Tanba sira nia governativa kumpre desizaun, rona malu no moris iha ambiente ne’ebé armonia  tebes e la eziste korrupsaun.

Liuhusi esperiénsia sira ne’e, ha’u bele dehan ita Timor-Oan sira, bai-bain ema ne’ebé mak iha mentalidade sertamente baruk atu halo manifestasaun oi-oin ou kria tumoltus oi-oin iha rai ida ne’e, tanba sira sente án katak sira iha abilidade no koñesimentu ne’ebé mak aas, sira konsiente katak atu hadi’a Nasaun ida ne’e nunka liuhusi dalan kontraditóriu maibé tenke hanoin pozitivu hodi koopera no buka tuir frakeza no ameasa Nasaun ninian hodi bolu malu hadi’a hamutuk ba futuru.

Timor-Leste presiza atu aprende liuhusi referendum pais ida ho naran Kanada. Iha pais ida ne’e sidadaun Kanada sorin balun  ne’ebé maka ho lian no tradisaun Fransa, kuaze fahe malu ho pais Kanada rasik iha momentu ne’eba, maibé ho konsiénsia ida ke forte no satisfas ho moris ne’ebé maka nakonu ho moris di’ak ne’ebé oferese husi sira nia ukun-nain sira liuhusi tratamentu ne’ebé hanesan (razoavel), no razaun sira ne’e maka sira deside nafatin to’o oras ne’e, sidadaun ne’ebé maka ho lian Fransa nafatin hamutuk ho Kanada. Tanba ne’e maka ita presiza fó hanoin ba ukun-nain jerasaun tuan Timor-Leste nian labele hanoin ba sira nia án de’it, maibé presiza hametin pás no unidade hodi garante futuru Nasaun ida ne’e ba longo prazu. No ba jerasaun foun sira presiza atu estuda no hasa’e nafatin ita nia grau estudu atu prepara án ba futuru Timor-Leste hodi luta iha era globalizasaun.

Liuhusi opiniaun sira ne’e hotu ha’u konvida sidadaun hotu iha rai ida ne’e “Vamos respeitar qualquer que seja a decisão. Como sociedade, é nosso dever apoiar quem lidera seu país. Vamos orar para que nossos líderes possam trazer o benefício da Timor-Leste pelos próximos 5 anos“. Husi hanoin sira ne’e ita bele koopera ho ukun-nain se de’it, maibé naran katak interpreta lei ho fuan no halo asaun ruma labele sees husi KRDTL hodi privatiza Nasaun soberania ida ne’e.

Hakerek nain nu’udar lisensiatura Jestaun Informatika, IOB

HAKEREK NO HATÁN

Please enter your comment!
Please enter your name here