Portavóz CIGC, Odete Viegas. Imajen Tatoli/Egas Critovão

Redasaun TATOLI, IP hakarak hato’o diskulpa ba públiku relasiona ho fallansu notísia anteriór ne’ebé haktuir pasiente ne’ebé halai lakon pozitivu Covid-19, tuir loloos mak pasiente ne’ebé halai lakon ne’e ho sintoma Covid-19.

Ba fallansu ne’e, redasaun halo ona retifikasaun.

DILI, 19 abríl (TATOLI) – Komandu Polísia Nasionál Timor-Leste (PNTL) daudaun ne’e buka tuir pasiente ho sintoma surtu COVID-19 na’in-ida tanba lakohi koopera ho profisionál saúde sira hodi halai lakon.

Portavóz Sala Situasaun Sentru Integradu Jestaun Risku (CIGC-sigla portugés), Odete Viegas da Silva hateten, informasaun ne’e nia parte simu diretamente hosi Komandu PNTL Munisípiu Dili, Superintendente Xefe, Armando Monteiro,  domingu ne’e.

”Maibé bainhira nia halo tratamentu iha Sentru Saúde Comoro ekipa vijilánsia tenki hatene no buka tuir  nia dadus sira tanba dadus ne’e iha ona Sentru Saúde Comoro,’’ nia dehan durante konferénsia imprensa iha CCD, ohin.

CIGC kontinua koordena ho PNTL hodi buka tuir pesoál ne’ebé iha sintoma ona ba COVID-19 atu nune’e bele deteta hodi izola iha fatin izolamentu Sentru Saúde Vera Cruz Dili.

Ho kazu ida-ne’e, tuir Odete, Timor-Leste iha ona transmisaun lokál tanba ne’e husu komunidade ida-idak atu hakmatek iha uma hodi prevene moras ne’e atu labele da’et ba  ema seluk.

”Tanba ne’e mak husu ba públiku akompaña informasaun COVID-19 nian iha Sala Situasaun Jestaun Krize ne’ebé mak fó-sai ho loloos ho akurativu iha oras tuku 15:00 otl,’’ tenik portavóz ne’e.

Pasiente refere detetadu iha sintoma ba moras Covid-19 hafoin halo tratamentu saúde iha Sentru Saúde Comoro Dili, ohin.

Jornalista : Felicidade Ximenes

Editór       : Agapito dos Santos

3 KOMENTÁRIU

  1. Hein katak familia sira husi Ema nbe moras Virus Covid19 ne ble koopera ho Estadu entrega nia iha fatin Izolamentu.

  2. Favor ida ekipa bele konfirma ba xefe suco ho xefe aldeia iha Timor laran tomak atu kopera ho governo para kaer ema ne ho lais. Estudante sira labele hanesan ne. Sai estudante, tenke sai matadalan ida lolos ba nia povu, hodi kontribui ba salva vida povo no nasaun Timor.

HAKEREK NO HATÁN

Please enter your comment!
Please enter your name here