Portavóz CIGC, Odete Viegas. Imajen Tatoli/Egas Critovão

DILI, 19 abríl 2020 (TATOLI) – Kuarentena obrigatóriu sira ne’ebé Governu liuhosi Ministériu Saúde prepara hodi akumula hamutuk sidadaun sira ne’ebé tama maihusi rai-li’ur, dadaun ne’e hamutuk 17 no akumula ema hamutuk na’in-460.

Kuarentena sira ne’e iha Dili laran mak hanesan, Ótel Novu Horizonte, Ótel SK, Ótel Audian, Ótel Luz Clarita, Ótel Timing, Ótel Chongtu, Ótel Kolmera, Ótel Vila Verde, Sakura, Tibar, Ótel Times Square, Leocase, Luxury, Otél Farol, Ótel Timor, Ótel Lecidere, no Tasi-tolu.

“Loloos ne’e kuandu ema sai barak ema ótel mós tenke menus liután, maibé tenke kumpre regra Organizasaun Saúde Mundiál (OMS) maka presiza tau ema ida iha kuartu ida, tan ne’e maka ótel númeru sei boot no ema ida tenke okupa duni kuartu ida”, relata Portavóz Sentru Integradu Jestaun Krize (CIGC, sigla portugés), Odete Viegas liuhosi konferénsia imprensa iha Salaun Sentru Mídia COVID-19, iha Sentru Konvensaun Dili (CCD, sigla portugés), domingu ne’e.

Tuir atuál Diretóra Jéral Prestasaun Saúde ne’e, Timor-Leste sei iha situasaun di’ak tanba sei bele kontrola ema sira ne’ebé mak tama mai no sira ne’ebé maihusi dalan ilegál.

“Ida-ne’e mós akomoda hotu. Agradese no kongratula mós ba komunidade sira iha munísipiu, tanba koopera di’ak tebes tanba sira hetan ema ne’ebé tama mai ilegál sira foti kedas asaun koordena ho autoridade lokál. Ne’e signifika katak ita-nia populasaun sira mós iha ona konsiensia katak hakarak asegura ema, maibé husi parte ida mós sira ladún fó importánsia katak moras ne’e mós ba ita no komunidade”, dehan Odete Viegas.

Entretantu tuir dadus ne’ebé atualiza husi CIGC iha domingu (19/04), katak totál ema sira iha konfinamentu obrigatóriu ka kuarentena obrigatóriu hamutuk 608, husi númeru ne’e iha auto-kuarentena iha Dili laiha ona, munisípiu sei iha na’in-14.

Enkuantu, kuarentena obrigatóriu iha Dili hamutuk na’in-460 no iha munisípiu 134.

Kazu konfirmadu hamutuk na’in-19, kazu foun ida, rekuperadu na’in-ida, negativu 208, suspeitu 323, hein rezultadu na’in-92, provável na’in-haat.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here