Portavóz CIGC, Odete Viegas. Imajen Tatoli/Egas Critovão

DILI, 19 abríl 2020 (TATOLI) Portavóz Sentru Integradu Jestaun Krize (CIGC, sigla portugés), Odete Viegas, hateten hahú horseik (sabádu) ekipa husi Ministériu Saúde hahú aplika ezersísiu fíziku ba abitante sira iha fatin kuarentena iha Tasi-Tolu, Dili.

Atuál Diretora Jéral Prestasaun Saúde ne’e dehan, objetivu ekipa saúde sira aplika ezersísiu fíziku ne’e atu halakon hanoin barak abitante sira ne’e durante iha kuarentena.

“Aproveita mós oportunidade ida ne’e, hakarak hato’o mós ba públiku katak horiseik ami halo akonsellamentu ba maluk sira ne’ebé maka iha kuarentena Tasi-Tolu, falta informasaun sai mós fonte ida atubele hanoin barak. Tanba ne’e husi parte saúde hanoin katak apoiu morál, psikolojiku importante no mós iha kreatividade ruma ba sira, entaun ohin dader hahú halo ezersísiu maibé nafatin aplika distansiamentu sosial, uza nafatin medida preventiva ne’ebé maka iha. Sira mós rekoñese katak iha buat balun sira la kumpre”, relata Odete Viegas liuhosi konferénsia imprensa iha Salaun Sentru Mídia COVID-19, iha Sentru Konvensaun Dili (CCD, sigla portugés), domingu ne’e.

Portavóz CIGC ne’e afirma, timor-oan sira ne’ebé durante iha konfinamentu obrigatóriu agradese ba esforsu Governu nian, sosiedade tomak, no konfesaun relijioza sira ne’ebé durante ne’e apoia sira atubele kontinua nafatin kumpre kuarentena.

Nune’e molok sira sai, tenke hala’o fali teste atu nune’e sira-nia rezultadu negativu dala-rua maka sira bele integra ba sosiedade maibé nafatin prátika medida preventiva.

Biban ne’e, GIGC hakarak apela ba públiku atu labele halo diskriminasaun ba abitante sira ne’ebé daudaun iha izolamentu, se lae maka ne’ebé iha sintoma ruma lakohi informa ba pesoál saúde.

“Hakarak apela ba públiku katak agora ne’e mós mosu diskriminasaun ka stigma ba maluk sira ne’ebé mak pozitivu mós ba família, profisionál saúde, cleaner, no ema hotu ne’ebé maka hala’o servisu besik ba iha ita-nia maluk sira ne’e.

“Husu atu labele iha diskriminasaun, se lae ita nia maluk sira ne’e karik balun mak suspeitu sira labele hakbesik-án mai iha pesoál saúde sira no iha komunidade nia le’et no bele sai risku boot ba komunidade tomak iha fatin ne’ebé ema sira ne’e hela”, dehan Odete Viegas.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here