Portavós CIGC, Odete da Silva Viegas. Imajen Tatoli/Egas Cristovão

DILI, 19 abríl 2020 (TATOLI) – Liuhusi Sala Situasaun, Portavóz Sentru Integradu Jestaun Krize (CIGC, sigla portugés), Odete Viegas, informa daudaun ne’e rejista tan kazu konfirmadu COVID-19 na’in-ida.

Nia adianta, totál kazu konfirmadu daudaun ne’e hamutuk 19, kazu foun ida no kazu rekuperadu ida.

“Kazu pozitivu ba ohin loron maihusi Otél Lecidere. Alin ne’ebé maka hetan pozitivu nia viajen husi Bandung bá Jakarta iha 30 marsu 2020 uza travel, Jakarta bá Kupang uza aviaun Batik Air, husi Kupang bá Atambua nia aluga karreta Avansa ba nia mesak”, dehan Portavóz liuhosi konferénsia imprensa iha Sentru Mídia COVID-19, iha Sentru Konvensaun Dili (CCD, sigla portugés), domingu ne’e.

Nia haktuir, alin-feto ne’ebé konfirmadu ne’e toba kalan ida iha Atambua, iha Otél Timor Travel, no husi Atambua bá Batugade nia sae ojek, husi Batugade mai Dili iha loron 31 marsu ho Bus Bintang Maliana.

“Pozitivu agora hamutuk 18 ona, ita foin atu halo mudansa ba alin ida pozitivu ne’e bá fatin izolamentu iha Vera Cruz”, nia akresenta.

Portavóz ne’e subliña, bainhira pasiente pozitivu ne’e tama tan hamutuk na’in-22 mak iha fatin izolamentu Vera Cruz, tanba tama ho provável na’in-haat.

“Provável hela iha fatin ketak no pozitivu hela fatin ketak. Provável maihusi Otél Katuas rua, Otél Fortuna ida no Otél Novo Horizonte ida”, nia realsa.

Entretantu, daudaun ne’e rejista suspeitu hamutuk 323, provável sei mantein nafatin ema na’in-haat, hein rezultadu 92 no negativu 208.

Enkuantu, kuarentena obrigatóriu no auto-kuarentena hamutuk 608.

“Husi 608 ita fahe ba kuarentena obrigatóriu 594, husi Dili 460 no husi munisípiu 134, auto-kuarentena hamutuk 14, husi Dili laiha no husi munisípiu mak maka ema na’in-14”, Odete Viegas informa.

Nune’e mós ema ne’ebé pasa ona kuarentena loron 14 to’o ohin loron hamutuk 1.399.

Tuir Portavóz, daudaun ne’e Xefe Departementu Vijilánsia Epidemiolojia kontaktu ona ho portavóz iha Indonézia, tanba Timor-Leste tama ona hanesan membru International Health Regulation, atu fó hatene pontu fokál atu buka tuir ema sira ne’ebé lori pasiente konfirmadu sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here