Ekipa téknika RAEOA-ZEESM, halo diskusaun ho Jerente Telemor iha Edifísiu Farol, Dili, iha kinta (16/04). Imajen/Mídia RAEOA-ZEESM TL

DILI, 18 abríl 2020 (TATOLI) – Ekipa téknika Gabinete Prezidente Autoridade Rejiaun Administrativa Espesiál Oé-cusse Ambeno (RAEOA) no Zona Ekonomia Espesiál Sosiál Merkadu (ZEESM) hamutuk halo operadór telekomunikasaun vietnamita, Telemor, iha kinta (16/04) hahú halo diskusaun ba proposta instalasaun aplikasaun telekonferénsia hodi fasilita autoridade komunika ho pesoál saúde sira relasiona ho COVID-19.

Tuir nota ne’ebé Agência Tatoli asesu sábadu ne’e, inisiativa ne’e nu’udar esforsu hodi impede propagasaun Coronavírus, hafoin Prezidente Republika, Francisco Guterres ‘Lú Olo’ deklara Estadu Emerjénsia iha loron 27 marsu no hahú vigora iha 28 marsu 2020 iha oras 00:00 to’o loron 26 abríl 2020 oras 00:59.

Koordenadór Téknika Prinsipál, Azevedo Lourenço da Costa Marçal, apresia diskusaun faze dahuluk ne’e no rekuñese katak hodi hatan  ba nesesidade imediata kona-ba medida prevensaun propagasaun surtu COVID-19, aparellu hirak ne’e sei ajuda tebes Autoridade RAEOA hodi kontinua komunika nafatin ho pesoál saúde sira, liuliu sira ne’ebé oras ne’e hala’o hela servisu iha Sentru Akollimentu.

“Lori Prezidente Autoridade RAEOA nia naran, ami hato’o agradese uain ba inisiativa hirak ne’e. Ami sei aprezenta rezultadu husi sorumutu ne’e ba Prezidente RAEOA hodi tetu ho serienidade tomak antes foti desizaun kona-ba proposta husi  Telemor”, tenik Azevedo Lourenço, iha Edifísiu RAEOA-ZEESM.

Tuir planu, bainhira hetan ona aprovasaun husi Autoridade RAEOA, aplikasaun telekonferénsia ne’e sei instala iha eskritóriu RAEOA no Sekretária Rejionál sira iha Oé-Cusse, inklui mós eskritóriu RAEOA-ZEESM iha Farol, Dili.

”Telemor sei serbisu hamutuk ho Autoridade RAEOA liuliu Unidade Informasaun, Komunikasaun no Teknolojia, hodi instala telekonferénsia iha fatin sira ne’ebé identifika ona hodi fasilita servisu Autoridade RAEOA”, dehan Diretór Ezekutivu Telemor, Tran Van Bang

Proposta husi Telemor ne’e, hodi fó tulun ba Autoridade RAEOA hodi utiliza ho gratuita aplikasaun telekonferénsia nu’udar meiu komunikasaun efikáz, hodi fasilita Autoridade RAEOA halo komunikasaun ho Komisaun COVID-19 RAEOA iha luta kontra pandemia globál ne’ebe mak oras nee alastra iha mundu tomak inklui Timor Leste.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here