Portavóz Gabinete Sentru Integradu Jestaun Krize, Sérgio Lobo. Imajen Tatoli/Egas Cristóvão

DILI, 18 abríl 2020 (TATOLI)–Koordenadór Forsa Tarefa Prevensaun no Mitigasaun Surtu Covid-19 no Portavóz Sala Situasaun Centro Integrado Gestão Crise (SS-CIGC), Sérgio Lobo, hateten SS-CIGC rekoñese katak maluk timoroan sira ne’ebé oras ne’e iha kuarentena, iha hela presaun psikolójika.

Rekoñesimentu ne’e, dr. Sérgio espresa liuhusi konferénsia imprensa ne’ebé hala’o iha Sala Situasaun Jestaun Krize, Centro Convencões Dili, ohin.

“Lori SS-CIGC nia naran ha’u hakarak afirma katak ami komprende tebes nível estres ne’ebé kolega sira iha kuarentena nia laran sente agora, tanba informasaun ladún loos, no mós tanba fasilidade barak mak sei falta. Ami apresia no valoriza tebes sakrifísiu ne’ebé sira hotu enfrenta iha kuarentena no izolamentu”, nia hateten.

Tanba ne’e, Sérgio salienta, SS-CIGC servisu hamutuk ho instituisaun no entidade relevante-sira sei esforsa nafatin atu hadi’a kondisaun iha fatin kuarentena, inklui apoiu psikolójiku no disponibilizasaun informasaun di’ak ba sira.

Iha oportunidade ne’e, dr. Sérgio hakarak apela nafatin ba populasaun tomak atu tau nafatin fiar ba Governu ne’ebé agora lidera prosesu prevensaun no mitigasaun moras Covid-19. Rona no fiar de’it informasaun sira ne’ebé sai husi konferénsia imprensa ne’ebé SS-CIGC realiza loron-loron.

Nia husu atu kolabora no partisipa ho disiplina iha distansiamentu sosiál, distansiamentu fíziku no ijiene pesoál. Tuur hakmatek iha uma no sai de’it husi uma kuandu presiza tebes duni. Fase liman beibeik, liuliu bainhira tama iha fatin públiku. Uza máskara bainhira sai, liuliu tama iha fatin atendimentu públiku. Kuandu presiza halibur malu, labele liu ema na’in-lima (5).

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here