Update kazu COVID-19 ba loron 18 abríl 2020.

DILI, 18 abríl 2020 (TATOLI) – Governu liuhosi Sentru Integradu Jestaun Krize (CIGC-sigla portugés) aposta objetivu estratéjiku haat (4) ba prevensaun no metigasaun luta kontra surtu Coronavirus ka COVIC-19 iha Timor-Leste.

Notísia Relevante : Eis Primeiru-Ministru Afirma COVID-19 Problema Sériu La’ós Espekulasaun

Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

Koordenadór Ligasaun Ofisiál ba Forsa Tarefa COVID-19, Rui Maria de Araújo, ohin, iha Sentru Mídia COVID-19 iha Sentru Konvensaun Dili (CCD),  esklarese katak, objetivu estratéjiku haat ne’e mak hanesan;  dahuluk, garante kuarentena ne’ebé di’ak, signifika katak, ema ida tenke hela iha kuartu ida, depois labele iha kontaminasaun ba mai oinsá abitante sira ida-idak disiplina hela iha nia kuartu no presiza halo disinfectant hodi rega ai-moruk beibeik iha fatin kuarentena nune’e labele iha kontaminasaun.

Rui Araújo lia tun-tan dehan, tanba ne’e ba sidadaun ne’ebé hala’o viajen hosi nasaun afetadu submete obrigatóriu ba kuarentena durante loron 14 no kapasidade atu garante kuarentena ladún maka’as, ho nune’e, governu suspende sirkulasaun ema-nian tama-sai hosi fronteira no aeroportu hodi bele prepara an liu tan.

Daruak, maka presiza identifika no halo izolamentu ba kazu-sira ne’ebé konfirmadu ba iha fatin Vera Cruz, inklui sira provavel mezmu sira seidauk serteza pozitivu hodi prevene transmisaun.

Datoluk, presiza prepara kondisaun hodi halo tratamentu ba kazu konfirmadu sira ne’ebé liu-liu grave.

Dahaat, presiza reforsa medida konvensaun maka sidadaun hotu tenke banati nafatin tuir regra Organizasaun Mundiál Saúde (OMS) no Ministériu Saúde nian hodi mantén distánsia sosiál no fíziku, uza  máskara, fase liman ho sabaun beibeik.

Rui Araújo informa, iha mós objetivu kooperasionais, hodi nune’e, apoiu objetivu estratéjiku hodi atinje mantén ou redús transmisaun moras atu alkansa objetivu estratéjiku haat ne’e.

CIGC tutela direita ba Primeiru-Ministru (PM) Taur Matan Ruak no tanba estadu emerjénsia, maka CIGC tenke transforma ba sala situasaun tanba ne’e hamosu estrutura ida hodi hala’o serbisu ho baze diploma Ministeriál PM nian hodi define komandu operasionál mak lidera hosi Primeiru-Ministru rasik.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here