Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 18 abríl 2020 (TATOLI)-Eis Primeiru-Ministru, atuál Portavóz Sentru Integradu Jestaun Krize (CIGC-sigla portugés) Rui Maria de Araújo afirma problema surtu COVID-19 iha Timor-Leste konsidera asuntu sériu no la’ós espekulasaun hosi Governu ba atinji sira-nia polítika iha Rai-laran.

Rui Maria de Araújo , esklarese kestaun ne’e relasiona ho preokupasaun públiku nian ne’ebé fó sai iha mídia sosiál katak aproveita problema COVID-19 hodi implementa estadu emerjénsia ba atinji interese sira-nian.

Doutór Timoroan ne’e ne’e konsidera preokupasaun públiku no mós sira ne’ebé hela iha kuarentena hanesan asuntu normáll tanba sira laiha koiñesementu kle’an kona-ba coronavirus ho ninia sintoma sira.

“Ita hotu imajina kuandu ita sira ne’e hotu fila hosi Indonézia mai di’ak hela hotu mak lakle’ur dehan pozitivu lakle’ur dehan ida ne’e, ita-nia reasaun ne’e halai ba negativu mak barak,” katak Rui Maria de Araújo ba Jornalista Sira iha Sentru Konvensaun Dili, (CCD) Merkadu Lama, sabadu ohin.

CIGC rekoiñese Timoroan sira ne’ebé maka daudaun ne’e hela iha kuarentena hasoru hela presaun psikolójika tanba ne’e ekipa psikologu voluntáriu balun oferese sira-nia an hodi fó konsellu ba abitante iha kuarentena no fatin izolamentu.

“Ita fiar katak ho apoiu sira ne’e ita bele esklarese buat hotu, kestaun sira ne’ebé mosu ha’u- nia interpretasaun katak reasaun psikolójika sira nian, maibé ema barak iha li’ur mak politiza buat hirak ne’e, hatete katak governu mak manipula buat hirak ne’e para hodi estende estadu emerjénsia, ne’e espekulasaun, sé mak la normál atu ba lakon tempu ba buat ida ne’e hodi servisu kalan to’o loron, trata buat hanesan ne’e, sé ema ne’e laiha moras ne’e perde tempu ho nia halo saida,” nia reforsa liután.

Nia esplika pasiente konfirmadu COVID-19 balun, ekipa médiku sira deteta hafoin halo teste ba amostra ruma maski la hatudu liuhosi sintoma ruma antes ne’e.

“COVID-19 nia kona ema ida la presiza nia hatudu sintoma ruma, bele mós kona ema ruma hatudu sintoma, bainhira kona ema ne’e hatudu sintoma tanba nia kondisaun fizíku fraku ka moras ruma iha hela, ne’ebé la hanesan atu prevene mak tenki izola nia an, atu hatene kona-ba ema ne’e pozitivu ba moras ne’e ka lae laliu hosi hasai raan tanba virus ne’e la’ós hela iha ita-nia ran nia hela iha ita nia kakorok hodi tun to’o ita nia pulmaun,” esplika Doutór Timoroan ne’e.

Tanba ne’e bainhira moras ne’e kona ema ne’ebé fizíku forte no imunidade di’ak la presiza atu halo tratamentu maibé nia imunidade sei kura rasik nia moras to’o rekupera fila-fali.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here