Portavóz Gabinete Sentru Integradu Jestaun Krize, Sérgio Lobo. Imajen Tatoli/Egas Cristóvão

DILI, 18 abríl 2020 (TATOLI)–To’o loron ohin, kazu COVID-19 iha Timor-Leste (TL) mantein ho kazu konfirmadu na’in-18 (pozitivu 17 no rekoperadu 1).

“Tuir atualizasaun dadus ikusliu ohin, 18 abríl 2020, tuku 12:00 otl, rezultadu husi totál teste laboratóriu, númeru teste hamutuk 314, pozitivu 18, negativu 195, provável 4. Hein rezultadu na’in-97, teste foun na’in-78 mai husi kuarentena Otél Timing, Fortuna, Novo Horizonte, Otél Audian, INAP, Tibar, Luz Clarita no husi Oé-Cusse na’in-19. Oras ne’e, ema neebé mak sei iha kuarentena hamutuk na’in-607”, Koordenadór Forsa Tarefa Prevensaun no Mitigasaun Surtu Covid-19 & Portavóz SS-CIGC, Sérgio Lobo, atualiza dadus ne’e liuhusi Konferésnsia imprensa iha Sala Situasaun Jestaun Krize, Centro Convencões Dili, sábadu ne’e.

Antes ne’e, iha 17 fulan-abríl, númeru teste 236, pozitivu 18, negativu 195, provável 4, hein rezultadu 19. Ema ne’ebé mak sei iha kuarentena hamutuk 607.

Doutór Sérgio aproveita mós atu esplika pontu hirak hanesan tuirmai ne’e:

Kazu konfirmadu no kazu provável ne’ebé agora Timor- Leste iha, restritu ba grupu ka ‘’cluster’’ iha haat (4). Grupu Otél Katuas hamutuk ema konfirmadu 16, provável na’in-haat (2). Grupu ida-ne’e maioria halo viajen hamutuk iha bis ida de’it, iha 01 abríl 2020 no sira hotu hela hamutuk iha Otél Katuas.

Iha Otél Fortuna provável ema-ida (1) no kazu ida-ne’e, ho ninia kolega sira seluk iha Otél Fortuna, halo viajen ho bis ne’ebé hanesan ho sira iha Otél Katuas, iha 29 marsu 2020.

Iha Otél Timing konfirmadu ida (1), no kazu ida-ne’e, viajen ho bis MTCI nian husi fronteira mai Dili, iha 2 abríl 2020.

Iha Otél Novo Horizonte provável ida (1), to’o iha fronteira iha 08 abríl, iha sintoma, halo teste no rezultadu indeterminadu.

Nia hatutan, sira na’in-21 iha hotu Vera Cruz, iha fatin ketak ba konfirmadu no fatin ketak ba sira provável. Ekipa médika sira monitoriza hela sira inklui mós iha kompañamentu espirituál no psikolójiku online, liuhusi Whatsapp.

Esplikasaun kona-ba kazu provável, tuir definisaun OMS (Organizasaun Mundiál Saúde), ‘’provável’’ signifika ema ne’ebé rezultadu laboratóriu indeterminadu, ka seidauk determina se konfirmadu ka lae, ka ema ne’ebé tanba situasaun la permite, seidauk bele halo ezame laboratóriu PCR (Polimerase Chain Reaction).

Ekipa formadór husi Institutu Nasionál Saúde no ONG Maluk Timor, ho apoiu husi parseiru dezenvolvimentu sira, halo formasaun ba ekipa médika-sira iha munisípiu no sentru saúde-sira iha Timor-Leste nia laran, hodi hahú halo triájen iha konsulta loron-loron iha fatin hirak-ne’e.

Triájen ninia objetivu maka identifika ema ne’ebé iha sintoma hanesan ho Covid-19, hodi fó konsulta ketak husi fatin konsulta jerál nian.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here