Fatin kuarentena iha merkadu fronteira iha Batugade, Munisípiu Bobonaro. Imajen Tatoli/Antónia Gusmão

DILI, 18 abríl 2020 (TATOLI) – Sentru Integradu Jestaun Krize (CIGC, sigla portugés) sei utiliza merkadu fronteira iha Batugade, Munisípiu Bobonaro sai kuarentena ba sidadaun sira bainhira tama ilegál husi Indonézia mai Timor-Leste, hodi nune’e bele evita propagasaunn COVID-19.

Ekipa GIGC ne’e lidera husi Koordenadór Destakamentu Reasaun Rápida, Aurélio Guterres, no akompaña husi Prezidente Autoridade Munisípiu Bobonaro, Jeferino Soares dos Santos, inklui ekipa husi Ministériu Saúde.

“Objetivu vizita destakamentu reasaun resposta rápida mai, liuliu ligasaun ho kuarentena mai iha Fronteira Batugade ne’e atu halo preparasaun fatin ba kuarentena ne’ebé daudaun ne’e ekipa saúde no Ministériu Turizmu, Komérsiu no Industria prepara hela”, informa Koordenadór ne’e, hafoin observa fatin kuarentena iha Fronteira Batugade, sábadu ne’e.

Tuir Aurélio Guterres, razaun prepara fatin kuarentena ne’e tanba haree daudaun ne’e ema tama ilegál loron-loron entre na’in-haat to’o lima.

“Bainhira sira tama ita bele foti kedan, iha pontu fronteira husi Mota-Ain to’o Mota-Masin (Suai). Ita-nia pesoál seguransa, autoridade lokál no komunidade sira bainhira hetan bele lori diretamente ba Dili, maibé Dili númeru amenta ba bebeik, entaun tenke prepara fasilisade iha liña fronterista atu nune’e bele akomoda ita-nia sidadaun sira ne’ebé tama ilegalmente”, nia akresenta.

Fatin ne’ebé antes ne’e sai hanesan merkadu fronteira ne’e sei akumula ema hamutuk na’in-28, ne’ebé kompostu husi kuartu 25 no kontainer tolu, ne’ebé sei utiliza ekipa médiku no mós fatin ba pesoál seguransa sira.

“Ami haree direta fatin ne’e nia kondisaun eselente, katak luan, ánimu no di’ak, ne’ebé ita prepara di’ak liután de’it fasilidade hanesan janela, ar-kondisionadu no haris-fatin”, dehan eis Ministru Negosiu Estranjeiru no Kooperasaun ne’e.

Nune’e, nia informa, iha semana oin ekipa téknika infraestrutura husi Ajénsia Dezenvolvimentu Nasionál (ADN) no ekipa seluk tan sei desloka ba munisípiu sira hodi prepara fatin sira ba kuarentena.

Sorin seluk, Prezidente Autoridade Bobonaro, Jeferino Soares dos Santos, hateten husi sira nia parte durante ne’e hamutuk ho ekipa sira iha munisípiu, nune’e mós apoia husi parseiru sira seluk hodi organiza no prepara fatin kuarente no izolamentu.

“Agradese tanba ekipa husi Sentru Integradu Jestaun Krize nian bele mai haree rasik. Ami mós la tuur hakmatek maibé ami halo sosializasaun ba komunidade kona-ba prevensaun COVID-19”, dehan Jeferino.

Responsavél Munisípiu Bobonaro ne’e salienta ekipa administrasaun servisu hamutuk ho ekipa saúde hodi fó atendimentu lalais bainhira parte seguransa halo apreensaun ba ema sira ne’ebé tama ilegál.

Atu evita ema tama ilegál, maka Prezidente Autoridade ne’e dehan sei servisu hamutuk ho parte seguransa atu redús movimentu kalan.

“Ami hakarak redús movimentu iha kalan, tanba kuandu movimentu kalan kontinua maka bele ema tama ilegál, durante ne’e movimentu sei kontinua no ami labele halo buat ida tanba ami presiza regulamentu ida hodi regula, ne’ebé presiza tebes tanba bainhira laiha maka ema tama ilegál no apoia tan husi família sira entaun tula sira bele lori bá ida-idak ninia uma, ida-ne’e sei perigu liu”, nia preokupa.

Entretantu fatin ne’ebé sei utiliza ba kuarentena ne’e lokaliza iha Fronteira Batugede ho fasilidade kompletu, hanesan saneamentu no bee moos, eletrisidade, no seluk tan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here