Prezidente Repúblika, Francisco Guterres Lú Olo. Imajen Tatoli/ António Gonçalves

DILI, 17 abríl 2020 (TATOLI)–Prezidente Repúblika, Francisco Guterres Lú Olo, alerta ona Oitavu Governu ne’ebé lidera husi Primeiru-Ministru (PM), Taur Matan Ruak, atu prepara-an ba senáriu ida-ne’ebé aat liu, oinsá mak bele sustenta povu ne’e iha tempu ne’ebé hahán laiha. 

“Prezidente Repúblika alerta, no ami haree hela dalan oinsá maka ita bele kontinua ita-nia kbiit atu prepara ita-nia an ba senáriu ida piór liu ne’e, bainhira hahán laiha karik halo nusa. Tanba ne’e mak ita iha Komisaun Interministeriál ida-ne’ebé maka asuntu ekonomia haree ba, liuliu foku sira ba iha estudu no preparativu-sira ba iha aspetu sosiál no ekonómiku, husi impaktu Coronavirus nian. Tanba ne’e maka iha tempu badak, ami sei haree medida oinsá maka ita bele responde situasaun sira-ne’e”, PM Taur hato’o asuntu ne’e, hafoin enkontru semanál ho Xefe Estadu Lú Olo, iha Palásiu Prezidente Nicolau Lobato, Bairru Pité, Dili, ohin.

Xefe Governu konta tuir katak, Iha fulan-marsu, ministru asuntu ekonómiku fó-sai katak Timor-Leste iha foos natón atubele aguenta fulan tolu to’o haat. Bainhira iha abríl maka foos laiha ona, ne’e signifika katak família sira sosa barak no tau hela iha uma.

“La’ós hanesan ida baibain, para sosa saka ida hotu tiha mak mai sosa tan fali. Maibé, balun tauk sosa kedas saka haat to’o saka lima. To’o estoke tun, la signifika tanba ita han hotu ona, enkuantu ita halo fali estoke iha ita-nia uma”, Taur subliña.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here