Polisia Unidade Fronteira ho Ekipa Kuarentena Prende Ikan Ilegal iha Batugade.Imajen/PNTL Bobonaro

BOBONARU, 16 abríl 2020 (TATOLI) – Unidade Polísia Fronteira (UPF) ho Ekipa Kuarentena Motain, Postu Administrativu Balibo, Munisípiu Bobonaru, kinta ne’e apreende ikan balde 18 tanba halo tranzasaun ilegál iha Atambua, Indonézia.

Komandante Polísia Munisípiu Bobonaru, Superintendente Xefe, Octávio de Araújo Bucar, haktuir relatóriu ne’ebé simu hosi Komandante Polísia Eskuadra Batugade katak atividade ilegál ne’e akontese maizumenus tuku 9:30 iha tasi klaran área Batugade.

Ikan importadu Ilegál.

“UPF Eskuadra Batugade ho Kuarentena konsege hapara tranzasaun ilegál ne’ebé halo hosi populasaun Batugade ho peskadór hosi Indonézia iha Tasi-Laran”, katak Komandante Octávio de Araújo Bucar, ba TATOLI via telefone, ohin.

Komunidade na’in-tolu ne’e, Unidade Polísia Fronteira ho Ekipa Kuarentena asegura kedas iha kuarentena Motain hodi halo teste ba COVID-19 tanba foin halo kontaktu direta ho ema rai-li’ur.

“Ikan sira-ne’e, ekipa konsege destroi ona iha área Manduki no suspeitu na’in-tolu submete ona ba Kuarentena Motain”, nia haktuir.

Jornalista : Agapito dos Santos

Editór       : Francisco Simões

HAKEREK NO HATÁN

Please enter your comment!
Please enter your name here