Estudante eskola primaria nain haat hosi eskola São José la’o ain fila ba uma hafoin remata exame iha iha sira nia eskola. Kuarta, 5 abríl 2017. Imajen TATOLI/António Goncalves

DILI, 17 abríl 2020 (TATOLI) – Fundu Nasaun Unida ba labarik (UNICEF, sigla inglés) hatudu sira-nian preokupasaun ba labarik sira durante períodu pandemia corona-virus ka Covid-19, tanba sira-nian moris hahú muda ba online.

“Eskola taka no restrisaun konsiste husi medida sira katak família barak mak depende liu ba solusaun teknolojia no dijitál atu mantein labarik sira estuda, divertidu no asesu ba mundu iha liur, maibé laos labarik hotu iha koñesimentu nesesaria, abilidade no rekursu sira atu mantein sira-nia án rasik seguru iha online”, afirma Diretór Exekutivu Global ba Parseria ba Hapara Violensia, Howard Taylor, liuhosi komunikadu ne’ebé TATOLI asesu foin lalais liuhosi mídia UNICEF iha Timor-Leste.

Labarik no foinsa’e millaun 1,5 liu mak afetadu ona, tanba eskola taka iha mundu tomak. Estudante barak mak tuir eskola liuhosi online. Gasta tempu barak-liu ba plataforma virtuál sira bele halo labarik sira sai vulneravel ba esplorasaun seksuál online no pinta-án, hanesan predatór sira hein atu esplora pandemia COVID-19.

Nota ne’e mós hatutan, labarik sira kuran hasoru-malu oin ho oin ho maluk no família sira bele lori risku boot ba simu imajen seksualizadu sira, bainhira tempu ba online aumenta no la estrukturadu bele tau labarik sira ba potensialidade perigu tebes no konteudu violentu no mós risku boot ba gozu sibernetiku.

UNICEF hamutuk ho nia parseiru sira, Parseiru Global ba Hapara Violensia Hasoru Labarik Sira, International Telecommunication Union (ITU), United National Educational, Scientific and Cultural Organization (UNESCO), UN Office on Drugs and Crime (UNODC), WePROTECT Global Allience, World Health Organization (WHO), no World Childhood Foundation USA, lansa ona nota tekniku foun ho objetivu atu enkoraja governu sira, industria ICT, edukadór no inan-aman sira atu alerta, hola medida urjente sita atu mitiga risku potensiál sira, no garante labarik sira online hetan esperiénsia seguru no pozitivu durante COVID-19.

“Iha COVID_19 nia mahon, labarik tokon ba tokon nia moris temporariamente iha uma no batela (layer) sira. Ita tenke ajuda sira hodi hasoru realidade foun ne’e”, dehan Diretora Exekutiva UNICEF, Henrietta Fore.

Nia hatutan tan: “Ita apela ba governu no indústria sira atu tau hamutuk forsa atu mantein labarik sira no foinsa’e sira segura iha online liuhusi rekursu apropriadu sira seguransa-nian no instrumentu foun atu ajuda inan-aman no edukadór sira hanorin sira-nia labarik sira oinsá uza internet ho seguru”.

UNICEF liuhosi komunikadu ne’e halo rekomendasaun preliminaria ba asaun sira atu mitiga risku online ba labarik sira durante COVID-10 mak; governu presiza reforsa servisu protesaun labarik atu garante katak sira mantein onestu no ativu durante pandemia; treina saúde, edukasaun no servidór servisu sosiál sira kona-ba impaktu COVID-19 ba labarik-nia moris di’ak, inklui aumentu husi risku online; intensifika inisitiva konsientizasaun edukasionál kona-balabarik online seguru, no garante servidór servisu sosiál, eskola, inan-aman no labarik sira konsiente ba mekanismu relatóriu lokál sira no apoia membru liña lokál ba apoiu no liña direta lokál sira.

Rekomenda mós ba informasaun indústria teknolojia inklui rede plataforma social atu asegura plataforma online sira reforsa seguransa no medida salva guarda sira, espesialmente instrumentu aprendizajen virtuál sira, no sira hetan asesu klaru ba edukadór, inan-aman no labarik sira; promove no fasilita servisu referál ba labarik seguru no liña ba apoiu; dezenvolve polítika padraun moderasaun maka liña ho labarik sira-nia direitu; imprega medida protesaun integrada no halo inovasaun karik presiza, no fornese konetividade internet atu hadi’ak asesu ba labarik desfavoresida sira iha uma-kain ho rendimentu ki’ik.

Nune’e mós ba eskola sira atu atualiza polítika atuál sira hodi refleta realidade foun ba labarik sira-nia aprendizajen iha uma; promove no monitoriza ambiente online di’ak sira no garante katak labarik sira hetan asesu kontinua ba eskola-bazeadu ba servisu akonsellamentu.

Husu mós ba inan-aman sira atu garante labarik sira-nia despozitivu infantil halo atualizasaun ba sira-nia software ho programa anti-virus modernu; hala’o diálogu abertu ho labarik sira kona-ba oinsá no ho sé sira halo komunikasaun online; servisu ho labarik sira hodi estabelese regra oinsá, bainhira no iha ne’ebe internet bele uza; alerta ba sinál hasusar ba labarik sira mak bele hetan husi konekasaun ho sira-nia atividade online, no familiariza ho polítika eskola distritu sira, no mekanismu relatóriu lokál no hetan asesu ba númeru apoiu liña lokál ba apoiu no liña direta ho liman. (ki)

HAKEREK NO HATÁN

Please enter your comment!
Please enter your name here