Xefe Estadu Lú Olo no Primeiru-Ministru, Taur Matan Ruak. Imajen espesiál.

DILI, 17 abríl 2020 (TATOLI)–Primeiru-Ministru, Taur Matan Ruak, agradese ba Prezidente Repúblika, Francisco Guterres Lú Olo, ne’ebé kontinua fó Konfiansa atu lidera nafatin VIII Governu konstitusionál, hafoin retira hikas pedidu demisaun iha loron hirak liubá. 

“Enkontru semanál atu agradese ba Prezidente Repúblika, kona-ba konfiansa ne’ebé fó mai Oitavu Governu, liuliu ba Primeiru-Ministru, atu kontinua dezempeña ninia servisu lidera Oitavu Governu. Tanba hanesan ita-boot sira hatene, ha’u retira filafali ha’u-nia pedidu demisaun, no Prezidente Repúblika aseita hodi fó ninia konfiansa tomak ba Oitavu Governu Konstitusionál”, Taur Matan Ruak ba jornalista sira hafoin enkontru semanál ho Xefe Estadu Lú Olo, iha Palásiu Prezidente Nicolau Lobato, Bairru Pite, Dili, ohin.

Entretantu, Iha loron 8 abríl 2020, Taur Matan Ruak deklara dada-sai fali karta pedidu demisaun husi Primeiru-Ministru ne’ebé hatama iha 24 fevereiru 2020.

Nune’e mós, tuir komunikadu ne’ebé fó-sai husi Prezidénsia Repúblika iha loron 15 fulan ne’e katak Prezidente Repúblika haruka ona karta ba Primeiru-Ministru ho konteúdu aseita Primeiru-Ministru dada-sai karta pedidu demisaun.

Tuir artigu 112°, alínea b) Konstituisaun RDTL, kompete ba Prezidente Repúblika simu ka la simu pedidu demisaun husi Primeiru-Ministru. Kompete mós ba Prezidente Repúblika, aseita ka lae pedidu dada-sai pedidu demisaun husi Primeiru-Ministru, bainhira Prezidente Repúblika seidauk foti desizaun kona-ba pedidu demisaun.

Liuhusi karta ne’e, Prezidente Repúblika reafirma katak Primeiru-Ministru sei hala’o nafatin ninia knaar baibain ho efeitu konstitusionál no legál hotu-hotu.

Prezidente Repúblika hatete mós katak sei fó kolaborasaun institusionál ne’ebé presiza atu Primeiru-Ministru bele hala’o ninia mandatu nu’udar Xefe Ezekutivu, atu asegura funsionamentu regulár VIII Governu Konstitusional, tuir ita-nia Konstituisaun Repúblika.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here