Ministru Negósiu Estrajeiru no Kooperasaun, Dionísio da Costa Babo Soares. Imajen Tatoli/Egas Cristovão

DILI, 17 abríl 2020 (TATOLI) – Governu liuhosi reuniaun Konsellu Ministru ordinária kuarta (08/04), aprova Rezolusaun Governu hodi fó atribuisaun subsídiu ba estudante timor-oan ne’ebé mak hela iha estranjeiru, relasiona ho surtu COVID-19, maibé subsídiu ne’e sei aplika de’it ba estudante ne’ebé la hetan bolsa estudu (naun bolseiru).

Tuir Ministru Negósiu Estranjeiru no Kooperasaun, Dionísio da Costa Babo Soares, razaun Governu aplika de’it subsídiu ba estudante ne’ebé la hetan bolsa estudu, atu tulun inan-aman iha situasaun difísil, enkuantu ba estudante ne’ebé ho bolsu estudu kontinua nafatin hetan sira nia bolsa.

“Estudante sira ne’ebé mak hetan ona bolsa sei la simu subsídiu, maibé sira simu nafatin sira nia osan ne’ebé iha ona. Nune’e atu labele hetan osan husi fatin ida dala-rua, ne’e universál iha ne’ebé de’it regra mak ko’alia nune’e. Sira ne’ebé selu rasik ne’e mak inan-aman iha ne’e araska tanba situasaun ita bele ajuda sira”, dehan Ministru Dionísio iha edifísiu Ministériu Finansa, Aitarak-Laran, sesta ne’e.

Maski nune’e, governante ne’e seidauk hatene orsamentu hira maka sei oferese ba estudante naun bolseiru sira tanba daudaun sei iha faze diskusaun.

Antes ne’e, Ministru Ensinu Superiór, Siénsia no Kultura, Longuinhos dos Santos, informa prosesu pagamentu subsídiu ba estudante timor-oan iha rai-li’ur sei atraza tanba sei hein dadus kona-ba totál estudante la’ós bolseiru iha Indonézia hamutuk na’in hira.

Daudaun ne’e, Ministériu Ensinu Superiór, Siénsia no Kuktura (MESSK) liuhosi Gabinete Apoiu Estudante, servisu hamutuk ho adidu edukasaun Timor-Leste iha Indonézia, inklui Ministériu Negósiu Estranjeiru no Kooperasaun (MNEK) aselera hela servisu hodi verifika lista estudante iha Indonézia hodi konklui iha tempu badak.

Ministru Dionísio, realsa daudaun ne’e MNEK iha ona proposta atu asesu ba Fundu COVID-19 hodi submete ba Sentru Integradu Jestaun Krize (CIGC, sigla portugés).

“MNEK laiha orsamentu, maibé iha proposta oan ida de’it ne’ebé fó atensaun ba COVID-19, ba estudante sira iha rai-li’ur ne’ebé eskola inan-aman mak selu rasik”, Dionísio akresenta.

Governante ne’e esplika, proposta ne’ebé aprezenta ona iha reuniaun Konsellu Ministru liubá hodi tulun estudante sira, maibé bazeia ba nesesidade gastu nasaun ida-idak nian.

Jornalista: Hortencio Sanchez

Editora: Julia Chatarina

1 KOMENTÁRIU

  1. Parabens tanba srvisu ho honestu,,
    Parabens tanba la especial ba bolsu estudu mas especial ba non bolsu estudu,, urgulho tebes .. 🙏🙏🏼

HAKEREK NO HATÁN

Please enter your comment!
Please enter your name here