Sekretáriu Estadu Komunikasaun Sosiál, Merício Juvinal dos Reis 'Akara'. Imajen Tatoli/Egas Cristovão

DILI, 17 abríl 2020 (TATOLI)Hafoin Governu aprova dekretu ezekusaun Fundu COVID-19, kada ministériu prepara proposta no submete ba Gabinete Jestaun Krize hodi asesu ba fundu ne’e, tanba ne’e Sekretaria Estadu Komunikasaun Sosiál (SEKOMS) submete ona proposta.

Sekretáriu Estadu Komunikasaun Sosiál, Merício Juvinal dos Reis ‘Akara’, informa SEKOMS submete ona proposta atu mídia sira, tantu públiku no privadu bele kontribui halo kampaña prevensaun COVID-19.

“Ida prevensaun ba COVID-19 ita tau $207.000 atu apoia ita bo’ot (jornalista) sira, hanesan parte ida ne’ebé ita propoin atu apoia ba mídia, liuliu oinsá partisipa iha kampaña prevensaun ba COVID-19 ne’e. Ita hatama proposta iha Gabinete Jestaun Krize, ne’ebé hanesan pakote ida hamutuk ho Gabinete Primeiru-Ministru nian. Tempu badak kuandu loos ona ita sei anúnsia atu mídia sira bele mai aplika hodi kompete”, dehan Sekretáriu Estadu ne’e ba Agência Tatoli iha edifísiu Ministériu Finansa, Aitarak-Laran, sesta ne’e.

Tuir governante ne’e, inisiativa ne’e atu mídia sira bele partisipa fahe informasaun ba sidadaun sira liuhosi promosaun ka saida de’it maka kontribui ba prevensaun COVID-19.

“Sira hakarak partisipa halo iklan layanan publik ka promosaun ruma, hodi enkoraja komunidade atu halo prevensaun hafoin bele tama iha pakote prevensaun ida ne’e. Parte SEKOMS hatama ona proposta no agora hein desizaun finál, kuandu desizaun finál loos ona maka ita informa”, nia akresenta.

SEKOMS Submete Mós Proposta Rekuperasaun Ekonómiku

Sekretáriu Estadu Akara haktuir, parte SEKOMS propoin mós proposta iha pakote ekonómiku, kona-ba rekuperasaun ekonómiku ba empreza mídia ne’ebé hetan impaktu negativu iha situasaun krize surtu COVID-19.

“Agora pakote rekuperasaun ekonómiku ita haree oinsá impaktu ne’ebé durante ne’e mídia sira infrenta tanba situasaun ida-ne’e. Governu lakohi taka matan. Pakote rekuperasaun ekonómiku ne’e ita konsidera ida ne’ebé kona duni impaktu tanba situasaun agora, sira-nia jornalista sira dalaruma labele hetan pagamentu porsentu 100 tanba rendimentu mós tun no sira iha liña frente atu halo kobertura. Ne’e hotu ita sei konsidera”, nia esplika.

Tuir Akara, empreza mídia sira tama kategoria setór privadu ne’ebé hanesan parte ida husi negósiu.

Nia adianta, pontu balun diskute ona katak Governu iha planu atu fó tulun ba sira ne’ebé kona impaktu ekonomia direta hanesan mídia na’in sira, tanba sira tenke iha kapasidade selu mós sira-nia traballadór sira hanesan jornalista.

“Ita konsidera, tanba ne’e mak ita hatama proposta atu konsidera mídia privadu ne’ebé rejista iha Servisu Rejistrasaun no Verifikasaun Emprezariál (SERVE) tanba sira tama iha kategoria setór privadu”, nia subliña.

Nune’e, governante ne’e konsidera proposta rekuperasaun ekonómiku ne’e seidauk iha desizaun finál, tanba ne’e nia iha esperansa Konsellu Ministru iha desizaun iha tempu badak atubele hahú ko’alia ona kona-ba ninia implementasaun.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here