Sekretáriu Estadu Formasaun Profisionál no Empregu, Julião da Silva. Imajen Tatoli/Egas Cristovão.

DILI, 17 abríl 2020 (TATOLI) – Sekretáriu Estadu Formasaun Profisionál no Empregu, Julião da Silva, hateten parte Sekretaria Estadu Formasaun Profisionál  no Empregu (SEFOPE), sei buka meiu ba traballadór sira servisu iha Austrália ne’ebé kontratu ramata ona no hakarak fila ona maibé labele tanba liga ho pandemia globál COVID-19.

Governante ne’e adianta, sei haree posibilidade atu koordena ho ajénsia no emprenza ne’ebé timor-oan sira servisu, atu komunika estende kontratu sira ne’ebé hotu ona ka buka servisu seluk, nune’e timor-oan sira bele provizóriu hela iha ne’ebá to’o krize ne’e ramata.

“Dalan seluk, ami bele halo mós ba sira ne’ebé maka kotratu hotu ona, liuliu traballadór sira iha  Austrália. Ita buka fali ajénsia seluk atu kontratu fali sira hodi halo servisu seluk atu sira iha ne’ebá bele sustenta sira-nia moris, hodi situasaun pandemia COVID-19 laiha ona maka sira bele fila”, dehan Sekretáriu Estadu Julião ba Agência Tatoli, iha nia knaar fatin, Caicoli, sesta ne’e.

Nune’e mós, kona-ba viza, parte SEFOPE koordena ona ho Ministériu Negósiu Estranjeiru no Kooperasaun (MNEK), hodi bele komunika ho Governu Austrália no Koreia atubele fó estensaun viza ba traballadór timor-oan sira.

“Ba traballadór sira ne’ebé maka kontratu hotu ona iha Austrália no Koreia, ita koopera ho MNEK, atu nasaun sira hanesan Austrália no Koreia bele ajuda estende viza ba traballadór sira iha ne’ebá to’o bainhira situasaun normál ona no iha ona aviaun semo maka sira bele mai”, nia akresenta.

Enkuantu, to’o agora Sekretáriu Estadu ne’e seidauk iha dadus traballadór iha Austrália no Koreia hira maka komtratu hotu ona, tanba sira ba ho durasaun kontratu ne’ebé la hanesan no servisu iha área difirente.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here