Komandante Jerál PNTL, Komisáriu Faustino da Costa. Imajen Tatoli/ Egas Cristovão

DILI, 17 abríl 2020 (TATOLI)–Prezidente Repúblika, Francisco Guterres Lú Olo, husu ba membru Polísia Nasionál Timor-Leste (PNTL), atu kontinua dixiplina iha terrenu durante implementasaun Estadu Emerjénsia. 

“Xefe Estadu husu ba PNTL atu kontinua mantein dixiplina hodi hala’o nafatin knaar tuir regra ne’ebé hateten iha ita-nia lei sira”, Komandante Jerál PNTL, Komisáriu Faustino da Costa hato’o asuntu ne’e, hafoin enkontru semanál ho Xefe Estadu Lú Olo, iha Palásiu Prezidente Nicolau Lobato, Bairru Pité, Dili, ohin.

Faustino informa liután katak durante enkontru semanál entre Komandu Polísia Nasionál Timor-Leste ho Prezidente Repúblika, hato’o de’it kona-ba situasaun rai-laran, liuliu situasaun operasionál rutina sira ne’ebé Polísia Nasionál halo, aprezenta mós kona-ba surtu COVID-19 ne’ebé PNTL mós implementa hela, relativamente Estadu Emerjénsia ne’ebé agora daudaun la’o hela.

“Atu dehan katak situasaun seguransa iha nível territóriu nasionál la’o di’ak, kalma ka hakmatek”, nia subliña.

Tanba ne’e, nia hatutan, Prezidente Repúblika husu Komandante Jerál Polísia Nasionál Timor-Leste atu tranzmite apresisaun husi Xefe Estadu rasik ba membru sira hotu ne’ebé servisu iha terrenu durante implementasaun Estadu Emerjénsia.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here