Primeiru-Ministru, Taur Matan Ruak, bainhira hala'o enkontru ho Preszdente Repúblika, Francisco Guterres Lú Olo. Imajen Tatoli/António Gonçalves

DILI, 17 abríl 2020 (TATOLI)–Prezidente Repúblika, Francisco Guterres Lú Olo husu ba Governu atu kontinua tau-matan ba profisionál no tékniku sira ne’ebé serbisu iha liña oin hodi luta kontra COVID-19, iha rai-laran.

“Prezidente Repúblika husu Governu atu kontinua halo esforsu atu tau-matan, liuliu ba sira ne’ebé servisu iha liña oin”, Primeiru-Ministru, Taur Matan Ruak hato’o asuntu ne’e, hafoin enkontru semanál ho Xefe Estadu Lú Olo, iha Palásiu Prezidente Nicolau Lobato, Bairru Pite, Dili, sesta ne’e.

Líder másimu Oitavu Governu ne’e informa katak ekipamentu protesaun pesoál importante loos, no presiza dezinfekta fatin sira no informa hela mós katak daudaun nee Governu sosa hela ekipamentu sira-ne’e maibé seidauk to’o.

Tanba ne’e, Xefe Governu espera katak antes fulan ne’e ramata, Governu bele hetan ona ekipamentu sira-nee, hodi fó kbiit liután ba tékniku sira, profisionál sira atu bele servisu di’ak liután.

“Informa uitoan ba Prezidente Repúblika kona-ba ita-nia preparativu no mós númeru kazu corona ne’ebé Ita enfrenta iha ita-nia rain. Ba daudaun ne’e timoroan ne’ebé pozitivu hetan moras corona atinje ona kazu 18 no na’in-ida maka rekopera ona. Ita-nia esforsu atu sosa ekipamentu, ai-moruk no buat hotu ne’ebé presiza, atu bele responde situasaun ida-ne’e, ha’u aproveita informa ba Prezidente Repúblika”, Taur subliña.

Tuir planu, iha lorokraik ne’e, sei realiza enkontru Komisaun Interministeriál kona-ba jestaun krize hodi haree posibilidade ba estensaun ka lae Estadu Emerjénsia.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here