Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 17 abríl 2020 (TATOLI)—Prezidente Parlamentu Nasionál (PPN), Arão Noé de Jesus da Costa Amaral rekoñese médiku, autoridade defeza no segurasa no jornalista sira iha liña frente hasoru surtu COVID-19.

“Iha kontestu ida-ne’e ita hotu hatene hela sé-sé mak iha oin. Primeiru kedas médiku sira, segundu mak F-FDTL no PNTL, parte ida mak jornalista sira (mídia sira)”, nia dehan ba jornalista sira, iha Parlamentu Nasionál, sesta ne’e.

Nia esplika médiku sira mak iha liña frente dahuluk tanba kada loron halo tratamentu ba pasiente surtu COVID-19, tanba ne’e Estadu presiza fó garantia ba sira.

Nune’e mós FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) ne’ebé sai asegura implementasaun Estadu Emerjénsia hodi hasoru COVID-19.

Prezidente Parlamentu Nasionál ne’e mós fó-sai katak mídia liuhosi jornalista sira mak transmite informasaun ba públiku kona-ba kazu COVID-19 kada loron.

Arão Noé hatutan parte seguransa sivíl nian mós fó kontribuisaun tanba ne’e sira merese hetan atensaun.

“Atu fó subsídiu ba sé-sé ne’e kompeténsia Governu nian. Montante hira ba hira ne’e kompeténsia Governu nian maibé merese Estadu fó atensaun, liuliu liña frente médiku sira, sira ne’ebé lori ambulánsia ne’ebé foti sai moras sira. Ema sira ne’ebé iha liña frente ne’e mós iha família. Tuir loloos sira preokupa hanesan ita katak lakohi sai hosi uma, di’akliu iha uma haree oan sira más tanba serbisu sira tenke hala’o sira-nia knaar inklui imi (jornalista sira)”, nia haklaken.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here