Sesaun Plenária Parlamentu Nasionál. Imajen Tatoli/António Gonçalves

DILI, 17 abríl 2020 (TATOLI)—Prezidente Parlamentu Nasionál, Arão Noé de Jesus da Costa Amaral, hateten plenária mak kompeténsia autoriza Prezidente Repúblika kontinua prolonga Estadu Emerjénsia iha territóriu nasionál.

Tuir Lei nú. 1/2020 kona-ba kriasaun Estadu Emerjénsia katak kada semana Parlamentu Nasionál tenke halo debate ho Governu kona-ba progresu implementasaun Estadu Emerjénsia, maibé horisehik foin realiza debate dala-ida.

Tanba, tuir nia, Governu hanesan implementadór ba Estadu Emerjénsia ne’e tenke fahe informasaun ba reprezentante povu sira iha Uma-fukun Parlamentu Nasionál.

Nia dehan, molok finaliza fulan ida autorizasaun Estadu Emerjénsia ne’e, Parlamentu Nasionál sei halo debate filafali ho Governu hodi hatene progresu no haree bá-oin.

“Prezidente Parlamentu labele ko’alia fali plenária nia kompeténsia. Estende ka lae ne’e kompeténsia plenária nian depois Governu ezekutór aprezenta razaun mai depois deputadu sira sei halo análize maibé desizaun iha plenária”, nia dehan ba jornalista sira, iha Parlamentu Nasionál, sesta ne’e.

Arão hatutan, tuir sistema lei Timor-Leste nian kona-ba deklarasaun Estadu Emerjénsia, Governu mak propoin ba Prezidente Repúblika no Xefe Estadu haruka karta ba Parlamentu Nasionál.

“Hafoin ne’e Parlamentu sei halo análize no autoriza ka lae. Ida-ne’e mak sistema ita-nian. Husik órgaun ida-idak ezerse ninia kompeténsia”, nia katak.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here