Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 17 abríl 2020 (TATOLI) – Ministru Obra Públika, Salvador Eugênio Soares dos Reis Pires, husu ba kliente Eletricidade de Timor-Leste (EDTL) ne’ebé seidauk asesu ba subsídiu pre-pagu eletrisidade atu kontinua manda mensajen ba númeru hotline 12150 liuhosi operadór telekomunikasaun tolu, hodi asesu subsídiu ho valór $15 ba kada kontadór.

Tuir dadus atualiza iha loron kinta (16/04), kliente ne’ebé hetan ona subsídiu pre-pagu eletrisidade husi operadór telekomunikasaun Timor Telecom, Telkomcel no Telemor hamutuk 111.558, husi kliente 160.555, ho nune’e kliente ne’ebé seidauk asesu hamutuk 48.997.

“Subsídiu ne’e fornese iha periódu Estadu Emerjénsia fulan-abríl nian, tanba ne’e kliente sira ne’ebé seidauk foti bele kontinua manda nafatin númeru kontadór pre-pagu ba operadór telekomunikasaun tolu ne’e liuhosi hotline 12150 hodi hetan token ka pulsa EDTL nian,” refere nota imprensa ne’ebé Agência Tatoli asesu, sesta ne’e.

Governante ne’e adianta, operadór telemomunikasaun kontinua manda token ba kliente sira to’o loron 26 abríl 2020.

Subsídiu ne’e naun finanseiru, tanba ne’e operadór telekomunikasaun manda de’it númeru token pre-pagu nian ho valór $15 ba kada númeru kontadór.

Subsídiu pulsa eletrisidade no bee-moos ne’e ho objetivu atu evita movimentasaun komunidade nian ba hola pulsa eletrisidade no selu bee-moos iha balkaun banku, no hela iha uma hodi mantein distánsia sosiál no evita kontaktu fíziku hodi prevene propagasaun COVID-19 iha Timor-Leste.

Meiu atu asesu subsídiu pre-pagu eletrisidade mak hanesan manda mensajen hakerek EDTL #númeru kontadór manda ba númeru hotline 12150, ne’ebé bele uza sim cart Timor-Telecom, Telemor no Telklmcel.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here