Ministru Defeza no Seguransa no Ministru Interiór interinu, Filomeno da Paixão de Jesus. Imajen Tatoli/Egas Cristovão

DILI, 17 abríl 2020 (TATOLI) – Daudaun ne’e kada ministériu prepara proposta hodi submete ba Sentru Integradu Jestaun Krize (CIGC, sigla portugés) atu asesu ba Fundu COVID-19 ne’ebé Governu aprova ona ninia dekretu ezekusaun, tanba ne’e Ministériu Defeza no Seguransa (MDS) no Ministériu Interiór (MI) prepara ona proposta.

Ministru Defeza no Seguransa no Ministru Interiór interinu, Filomeno da Paixão de Jesus, informa ministériu rua ne’ebé nia lidera, iha proposta millaun $12 iha orsamentu Fundu COVID-19 atu bele sosa ekipamentu protesaun no fó subsídiu ba membru Polísia Nasionál Timor-Leste (PNTL) no FALINTIL- Forsa Defeza Timor-Leste (F-FDTL), liga ba prevensaun no kombate ba surtu COVID-19.

“Ami hatama ona proposta hamutuk millaun $12. Ba F-FDTL millaun $6 no ba PNTL hamutuk millaun $6, atu hola ekipamentu protesaun importante atu sira bele uza hodi hala’o servisu hodi asegura prevensaun no kombate COVID-19”, tenik Ministru Filomeno ba Agência Tatoli, iha edifísiu Ministériu Finansa, Aitarak-Laran, sesta ne’e.

Governante ne’e adianta, ekipamentu ne’ebé sei sosa atu halo protesaun báziku sira maka hanesan máskara, luvas no sasán seluk tuir saida saúde fó sai ona.

“Ita dala ruma kona ona moras lakohi koopera atu ba izolamentu, sé maka barani ba kaer nia  tanba ita mós tauk vírus ne’e. Entaun ita presiza protesaun atu forsa rua ne’e apoia prevene no kombate vírus ne’e”, nia akresenta.

Iha fatin hanesan, Komansante Jerál Polísia Nasionál Timor-Leste, Komisáriu Faustino da Costa, informa, proposta ne’ebé hatama ona hamutuk millaun $6 ne’e foku liu ba ekipamentu protesaun no subsídiu ba membru PNTL sira durante períodu Estadu Emerjénsia.

“Buat rua ne’e mak ita haree importante liu atu ita tau iha ita-nia proposta. Ita mós propoin ba sasán balun ne’ebé ita tau iha kapitál menór, liuliu kombustível sira atu karreta bele kontinua funsiona hodi hala’o patrullamentu ka operasionál nian”, nia subliña.

Entretantu, orsamentu ba Fundu COVID-19 ne’ebé Parlamentu Nasionál aprova no Prezidente Repúblika promulga ona hamutuk $150 no parte Governu mós aprova ona dekretu ezekusaun.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here