Ministru Agrikultura no Peska, Joaquim José Gusmão dos Reis Martins. Imajen Tatoli/Egas Cristovão

DILI, 17 abríl 2020 (TATOLI)–Ministériu Agrikultura no Peska (MAP) prepara ona  proposta ho montante millaun $4,8-resin no submete ona ba Sentru Integradu Jestaun Krize (CIGC, sigla Portugés) atu asesu ba Fundu COVID-19, atu asegura ai-han iha rai-laran durante períodu Estadu Emerjénsia.

Ministru Agrikultura no Peska, Joaquim José Gusmão dos Reis Martins, informa, proposta ne’ebé submete ona ba CIGC, foku liubá produsaun hare, batar no ortikultura.

“Ho kustu orsamentu  millaun $4,8-resin ne’e, ita halai liubá natar hodi hasa’e produsaun hare no ba toos atu prodús batar no ortikultura tanba iha fulan-maiu, hahú tama ona époka daruak. Tanba ne’e, ita presiza halo manutensaun makaas ba tratór no mákina sira hodi normaliza fali ita-nia kanál irrigasaun tanba ita hatene udan boot ne’ebé hamosu sedimentasaun aas tebes”, tenik Ministru Joaquim ba Agência Tatoli, iha edifísiu Ministériu Finansa, Aitarak-laran, Dili, sesta ne’e.

Governante ne’e adianta, setór agrikultura nu’udar setór importante liu tanba iha situasaun Estadu Emerjénsia hodi luta kontra COVID-19, ne’e presiza hala’o produsaun ba produtu lokál atu asegura ai-han iha rai-laran.

Ho nune’e, ministru ne’e iha esperansa orsamentu ne’e bele hetan aprovasaun sedu tanba époka daruak ba produsaun ne’e iha fulan-maiu.

“Ita hakarak atu aprova lalais atu ita halo mobilizasaun lalais fini, kombustível ba tratór sira, movimentu ba ita-nia estensionista sira no adubu sira tanba buat barak ne’ebé ita presiza prepara, kuandu tarde tempu liu ona”, nia salienta.

Biban ne’e, Ministru Joaquim apela ba agrikultór sira atu kontinua prevene-an nafatin husi surtu COVID-19.

“Hakarak ka lakohi ita tenke tau osan atu dudu halo produsaun iha ita-nia rai rasik tanba nasaun importadór sira mós foku ba nia nasaun laran relasiona ho COVID-19,” nia akresenta.

Antes ne’e, Koordenadór ba Ekipa Estudu no Analiza Risku iha CIGC, Francisco Guterres, informa seguransa alimentár liuliu estoke ai-han ne’ebé Governu Timor-Leste no setór Privadu sira iha bele garante to’o fulan-jullu tinan ne’e.

Nia akresenta, hafoin ekipa halo estudu no analiza risku, observa no haree katak iha fulan-abríl to’o jullu estoke fós sei disponível atu asegura ai-han iha territóriu Timor-Leste.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here