Primeiru-Ministru, Taur Matan Ruak prezide reuniaun ho Komisaun Interministeriál no CIGC, kona-ba koordenasaun imementasaun ba Medidas Prevensaun no Kontrolu ba COVID-19, iha Ministériu Finansas, Aitarak-Laran, sesta (17/04).Imajen Tatoli/Egas Cristovão

DILI, 17 abríl 2020 (TATOLI) – Haree ba nesesidade atu halo distansiamentu sosiál relasiona ho surtu COVID-19, Komisaun Interministeriál hamutuk ho Sentru Integradu Jestaun Krize (CIGC, sigla portugés) iha ona desizaun atu estende tan períodu Estadu Emerjénsia ba loron 30.

Maski nune’e, desizaun ne’e sei lori ba Konsellu Ministru hodi halo deliberasaun ida no solisita ba Prezidente Repúblika hodi dekreta liuhosi autorizasaun Parlamentu Nasionál.

“Iha diskusaun no desizaun kona-ba estensaun ba Estadu Emerjénsia, membru komisaun halo desizaun ho konsensuál katak membru hotu konkorda laiha objesaun kona-ba halo hikas fali proposta ba estensaun Estadu Emerjénsia ba loron 30 tan. Ho nune’e ekipa legál sira haree ona servisu saida mak presiza halo, atubele hato’o fali pedidu dala-ida tan ba estensaun ne’e”, informa Ministru Reforma Lejizlativa Asuntu Parlamentár (MRLAP), Fidelis Manuel Leite Magalhães hafoin reuniaun komisaun interministeriál no ekipa CIGC iha salaun Ministériu Finansa, Aitarak-Laran, sesta ne’e.

Notísia Relevante: PR Lú-Olo Dekreta Ona Estadu Emerjénsia Hodi Prevene COVID-19

Tuir governante ne’e, razaun deside prolongamentu ne’e tanba tuir dadus ne’ebé atualiza kada loron husi CIGC, númeru konfirmadu ba COVID-19 iha Timor-Leste kontinua amenta.

“Desizaun ba estensaun Estadu Emerjénsia ne’e hahú, bainhira implmentasaun Estadu Emerjénsia ida agora ramata”, nia akresenta.

Iha loron 27 marsu, Prezidente Repúblika, Francisco Guterres ‘Lú-Olo deklara Estadu Emerjénsia hafoin Parlamentu  Nasionál a-favór ho unanimidade hodi fó autorizasaun ba Xefe Estadu dekreta, nune’e bele halo distansiamentu sosiál ne’ebé nu’udar meiu ida halo prevensaun ba COVID-19.

Estadu Emejénsia entra ein vigór iha loron 28 marsu, hahú oras 00:00 to’o 26 abríl 2020, oras 23:59.

Jornalista: Antónia Gusmão

Editora: Julia Chatarina

1 KOMENTÁRIU

  1. Imi hanoin buat hotu Diak deit Tamba ini bele iha Osan
    Kuidadu ba Ami povo nebe laiha salariu
    Ami atu fohan Ami Nia dengan Ian ho Datuk ga?

HAKEREK NO HATÁN

Please enter your comment!
Please enter your name here