Primeiru-Ministru, Taur Matan Ruak prezide reuniaun ho Komisaun Interministeriál no CIGC, kona-ba koordenasaun imementasaun ba Medidas Prevensaun no Kontrolu ba COVID-19, iha Ministériu Finansas, Aitarak-Laran, sesta (17/04).Imajen Tatoli/Egas Cristovão

DILI, 17 abríl 2020 (TATOLI)–Komisaun Interministeriál hamutuk ho Sentru Integradu Jestaun Krize (CIGC, sigla portugés) aprova ona medida sira iha setór ekonómiku, ligadu ho prevensaun no kombate COVID-19 iha Timor-Leste.

Medida sira iha setór ekonómiku ne’e, hetan aprovasaun hafoin Ministériu Koordenadór Asuntu Ekonómiku (MKAE) hala’o reuniaun ho ajénsia ekonómiku no liña ministeriál sira.

Ministru Koordenadór Asuntu Ekonómiku Interinu, Fidelis Manuel Leite Magalhães, relata katak reuniaun komisaun interministeriál hahú rona aprezentasaun husi MKAE kona-ba medida integrada Governu nian iha setór ekonómiku.

Atuál Ministru Reforma Lejizlativa no Asuntu Parlamentár ne’e realsa, medida sira-ne’e haree ba pontu importante sira hanesan konetividade ba transporte nian, distribuisaun sasán esensiál sira, telekomunikasaun, servisu báziku, kréditu no apoiu diretu ba sidadaun.

“MKAE koordena inisiativa sira husi liña ministeriál no fó apoiu ba ministériu sira atu elabora sira-nia polítika no programa, inklui asegura katak inisiativa medida hirak ne’ebé Governu foti labele estraga filafali ita-nia ekonomia, maibé pelu-kontráriu bele kontribui hodi nune’e ekonomikamente ita bele aguenta iha situasaun ne’ebé ita infrenta daudaun”, hateten Ministru Fidelis hafoin reuniaun Komisaun interministeriál no CIGC iha salaun Ministériu Finansa, Aitarak-laran, Dili, sesta ne’e.

Proposta ne’e maihusi liña ministeriál sira tanba iha faze implementasaun, liña ministeriál sira mak implementa no halo adaptasaun ba disponibilidade finanseira.

Biban ne’e, komisaun interministeriál mós rona aprezentasaun husi ekipa CIGC, ne’ebé atualiza informasaun ikus kona-ba sira-nia servisu no preparativu-sira hotu ne’ebé Timor-Leste halo hodi bele prepara-an di’ak liután hasoru COVID-19.

Fidelis subliña, alvu prinsipál maka bem estar populasaun nian tanba ekonomia nasaun nian ne’e agregadu husi família ida-idak nian.

“Atu dehan de’it katak foku prinsipál maka ekonomia uma-laran sira-nian, bem estar sidadaun sira-nian ne’ebé mak ikusmai sai xave ba Timor-Leste nia dezenvolvimentu. Ne’e fatór determinante ida-ne’ebé maka sei determina, bainhira ita bele halo moris filafali ita-nia ekonomia hafoin COVID-19 ne’e ka lae? Tanba COVID-19 iha impaktu ba ita-nia ekonomia. Ba detallu husi medida sira-ne’e sei fó-sai husi ministériu ida-idak, maibé atu dehan de’it katak iha komponente ne’ebé mak importante husi medida sira Governu nian”, nia dehan.

Komponente hirak-ne’e maka relasaun ho apoiu ne’ebé maka sei fó ba iha sidadaun sira, ne’ebé konstrui maioria husi intervensaun Governu nian katak konstitui porsentu 78 husi medida sira ne’ebé maka Governu foti iha setór ekonómiku.

Nune’e mós, komponente izensaun sira ne’ebé konstitui porsentu ualu no tuirmai mak pakote ida hanaran kréditu, ne’ebé pakote ida tau ketak tanba apoia ne’ebé mak sei maihusi kréditu sei rekupera filafali, tanba ne’e maka kréditu tau kategoria ketak no pakote kréditu konstitui porsentu 14.

“Governu hakarak garante katak ministériu relevante sira sei halo no lori servisu ne’e bá-oin, no sira rasik sei tun to’o komunidade nia leet bainhira implementa medida hirak-ne’e. Husu ba komunidade atu kalma, hela iha uma no hotu-hotu asegura katak ita la hetan moras ne’ebé mak espalla no ita mós la sai mákina ne’ebé hatutan fali moras ne’ebé espalla. Ida-ne’e mak importante liu”, nia salienta.

Governante ne’e esplika, husi intervensaun hotu Governu nia objetivu maka kontribui ba distansiamentu sosiál no distansiamentu fíziku, inklui família sira la sai mukit liután tanba situasaun ne’ebé mak akontese.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here