Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 17 abríl 2020 (TATOLI)-Portavóz Gabinete Sentru Integradu Jestaun Krize (CIGC-sigla portugés) Rui Maria de Araújo, hateten Ekipa Vijilánsia Epidemiolójika husi Ministériu Saúde agora daudaun ne’e aplika ona auto-kuarentena ba abitante ida iha Postu Administrativu Hatulia, Munisípiu Ermera tanba sintoma surtu COVID-19.

Aleinde konfinamentu iha uma, nia hatutan tan Ekipa Vijilánsia mós kontinua halo observasaun ba abitante ne’e nia saúde durante loron 14 hodi hein rezultadu teste ne’ebé halo husi ekipa Laboratóriu Nasionál hodi nune’e bele konfirma loloos abitante ne’e konfirmadu COVID-19 ka negativu.

“Ita hakarak informa ba públiku tanba agora daudaun kazu ida-ne’e iha Hatulia sirkula makaas loos, maibé ita-nia Ekipa Vijilánsia hamutuk ho ekipa Laboratóriu Nasionál iha ona terrenu no foti ona sampel husi abitante ne’e nian,” dehan Portavóz CIGC no mós Eis Primeiru-Ministru, Rui Maria de Araújo, durante konferénsia imprensa, iha Sala Situasaun CIGC CCD, sesta ne’e.

Atu prevene án hosi transmisaun surtu coronavirus, Doutór Timoroan ne’e kontinua husu ba ema-hotu atu mantein distánsia sosiál, evita konsentrasaun ema barak, fase liman beibeik ho sabaun.

Jornalista : Tomé Amado

Editór     : Agapito dos Santos

HAKEREK NO HATÁN

Please enter your comment!
Please enter your name here