Ema Na’in-124 iha kuarentena fatin lima rona esplikasaun husi Diretora Jerál Prestasaun Servisu Saude, Odete Viegas, molok re-integra filafali ba sosiedade. Seremónia ne’e realiza iha loron segunda (13/04), iha fatin kuarentena Otél Luz Clarita. Imajen Tatoli/Egas Cristovão

DILI, 17 abríl 2020 (TATOLI)-Tuir oráriu sesta (17/04/2020) ohin, Gabinete Sentru Integradu Jestaun Krize (CIGC-sigla portugés) re-integra ona abitante 84 ba sira-nia família hafoin kumpre ona kuarentena obrigatóriu durante loron 14 iha Otél, Leokasia Raikotu, Lecidere no Sakura Otél, maibé tenki adia tan ba loron rua.

“Parte Laboratóriu Nasionál husu ita adia prosesu re-integrasaun ne’e tanba abitante iha otél tolu ne’e sira-nia sampel sei halo konfirmasaun ba Austrália,” Informa Diretór Gabinete Polítika Kooperasaun, Ministériu Saúde, Narcisio Fernandes ba Jornalista Sira iha Otél Leokasia-Raikotu Dili, sesta (17/04/2020).

Tuir pedidu Laboratóriu Nasionál iha sesta dadeer ne’e katak abitante hirak ne’e persiza estende tan loron rua iha otél hodi hein rezultadu ikus atu konfirma loloos abitante hirak ne’e livre hosi surtu COVID-19 ka lae.

“Informasaun ne’ebé simu husi parte Laboratóriu Nasionál katak iha Otél Leokasia iha abitante na’in 3 mak ninia sampel sei konfirma hela, maibé  otél Lesidere no Sakura la hatene detallu,”nia akresenta.

Hosi abitante kuarentena obrigatóriu 84 ne’e, ema na’in 34 hela iha Otél Leokasia, Otél Lecidere hamutuk ema na’in 41 no Sakura iha okupante na’in sia. Abitante hirak ne’e kompostu hosi feto 37 no mane 47.

Kona-ba desizaun hodi adia prosesu re-integrasaun ne’e, nia dehan abitante barak iha Otél Leokasia maka la satisfas ho desizaun ne’e.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here